Pormal nga inawat ni Presidente Ferdinand R. Marcos Jr. ita nga aldaw, Agosto 12, ti 2026 National Expenditure Program (NEP) iti maysa a seremonia a naangay iti Palasio ti Malakanyang iti Siudad ti Manila.
Inyawat ni Department of Budget and Management (DBM) Secretary Amenah Pangandaman ti 2026 NEP ken ni Marcos, segun iti bideo a naipaskil iti Facebook ni DBM Undersecretary Goddes Hope Libiran.
Segun iti DBM, mayawat ti 2026 NEP iti Kongreso inton Huebes, Agosto 14.
Idi Hulio 15, inaprobaran ni Marcos ti singasing a ₱6.793 a trilion a nailian a badiet para iti 2026, ti kangatuan a badiet ti pagilian.
Senado, pinasingkedanna ti ₱6.793-trilion a nailian a badiet para 2026
Ti NEP ti singasing a nailian a badiet ti gobierno para iti sumaruno a tawen ken pagbatayan ti Kongreso iti panangbukelda iti General Appropriations Bill (GAB), nga agbalin a General Appropriations Act (GAA) apaman a maanamongan ti presidente.
Mairaman ditoy dagiti plano ti gobierno a paggastuan para iti sumaruno a fiscal year, ken ti nailatang a pondo para kadagiti nadumaduma a programa ken proyekto.
Kas maitunos iti Philippine Development Plan (PDP) 2023-2028, ipangruna ti 2026 NEP dagiti kangrunaan a programa iti edukasion, impraestruktura, digitalization, salun-at, ken social service. (Ruth Abbey Gita-Carlos/PNA//Lito Hilidon/Bannawag)
