Impalgak ni Senate Majority Leader Joel Villanueva idi Lunes, Agosto 11, nga awan ti senador a nakipaset wenno nainaig kadagiti 15 a construction firm a nairaman iti ₱545 a bilion ti balorna a flood control projects, kalpasan nga imbutaktak ni Presidente Marcos Jr. a nakaala dagitoy kontraktor iti 20 a porsiento ti pondo ti proyekto.
Segun ken ni Villanueva, adda ken ni Presidente Marcos ti pangngeddeng no rumbeng nga aglusulos ti Sekretario ti Department of Public Works and Highways (DPWH) a ni Manuel Bonoan kabayatan ti imbestigasion.
Kinuna ni Villanueva a napateg ti patas a panagimbestigar tapno awan ti makalisi ken madusa dagiti nakabasol, ket inyunay-unayna ti pannakabukel ti napaut ken maysa nga integrated flood control program, idinto nga agtalinaed a takuptakop ken saan naurnos ti trabaho ti gobierno.
Maipapan iti pannakairaman ti Kamara iti isyu, nagkedked nga agkomento ni Villanueva ngem kunana nga itedna laengen dagiti dokumento tapno isudan ti agsao.
Mapukpukaw a nobia, nasarakan iti Pangasinan
Iti sabali a bangir, inanamongan ni Villanueva ti ididiaya ni Ramon Ang, CEO ken presidente ti San Miguel Corporation, a tumulong iti pannakataming ti panaglayus iti Metro Manila a saan nga aggasto ti gobierno. Ngem indagadagna a maitunos koma dagiti trabaho ti pribado a sektor iti master plan ti gobierno, ta dagiti stand-alone a proyekto ket mabalin a saan a maitipon iti estratehia ti gobierno iti panangkontrol iti layus. (Dhel Nazario/Manila Bulletin//Lito Hilidon/Bannawag)
