Pimmusayen ti 15-anios a balasitang a pinaltogan ti dati a nobiona iti uneg ti classroom iti Sta. Rosa, Nueva Ecija idi Agosto 7.
Segun kadagiti report, kalpasan ti lima nga aldaw a kritikal ti kasasaadna iti ospital, pimmusay ti bitima a ni "Lea" idi rabii ti Martes, Agosto 12.
Sakbayna, naipadamag a natay met laeng ti suspek nga 18-anios a lalaki ken dati a kaayan-ayat ti biktima, idi Agosto 8.
Nagwaras iti media ken social media ti nakapay-an dagiti dua a tinedier a dati nga agayan-ayat kalpasan a pinaltogan ti suspek ti biktima a dati a kaayan-ayatna iti uneg ti eskuela, sa pinaltoganna met laeng ti bukodna a bagi.
Camalaniugan-Aparri Bridge, inaguraran ni Marcos
Segun iti imbestigasion ti polisia, ginubuay ti motibo ti suspek ti mapapati a saanna a pannaka-move on kalpasan ti panagsinada iti biktima.
Segun iti report, nangrugi ti relasion dagiti dua idi Hunio 2024, ngem nakisina ti biktima iti suspek idi 2025.
Maibasar kadagiti report, adda pay insidente nga imminum ti suspek iti sabidong iti sanguanan dagiti kabagian ti biktima tapno laeng kano agsubli ti balasitang kenkuana.
Agtultuloy ti imbestigasion dagiti autoridad no kasano a naipuslit ti suspek iti uneg ti eskuela ti paltog nga inaramatna ken no kasano no nakaalaanna iti nasao a paltog. (Kate Garcia/BALITA)
