Papigsaen ti Armed Forces of the Philippines (AFP) dagiti agtipon nga aktibidad a kaduada ti Japan Self-Defense Forces (JSDF) apaman a maipatungpal ti Reciprocal Access Agreement (RAA) ti Filipinas ken Japan inton Septiembre.
Segun ken ni Department of National Defense (DND) Secretary Gilberto Teodoro Jr. iti naangay a seremonia iti Department of Foreign Affairs (DFA) headquarters iti Siudad ti Pasay idi Agosto 12, nabuangay ti tulag a maibatay iti natibker a singgalut dagiti tattao, maymaysa a prinsipio, ken maymaysa a panggep.
Naangay ti formal exchange of notes nga indauluan da Department of Foreign Affairs (DFA) Secretary Maria Theresa Lazaro ken Japanese Ambassador to the Philippines Endo Kazuya, a sinaksian ni Teodoro, a maysa a napateg a batonlagip iti dumurdur-as a panagkadua dagiti dua a pagilian.
Maipatungpalen ti RAA 30 nga aldaw kalpasan ti exchange of notes wenno inton Septiembre 11.
Retirado a heneral, nakemmeg gapu iti panangsugsog a mangtippuog iti gobierno
Mapalubosanton dagiti dua a pagilian a sumrek iti teritorio ti maysa ken maysa tapo agsanay, mangisayangkat iti humanitarian operations, ken dadduma pay a napagtutulagan nga aktibidad, nga awan ti adu a rikititos iti proseso.
Kinuna ni Teodoro a saan laeng a papigsaen ti RR ti panagtinnulong ken panglapped kadagiti posible a pangta, no di ket mangipasdek iti kinatibker babaen ti panagtinnulong iti industria ti depensa, panagsinnukat iti teknolohia, panangbangon kadagiti impraestruktura, ken proyekto a mangikonektar iti internet.
Napirmaan ti RAA idi Hulio 8, 2024 a nakaangayan ti Philippines-Japan Foreign and Defense Ministerial Meeting or 2+2 Meeting. Pinatalgedan ti Senado ti pannakaanamong ti RAA idi Disiembre 16, 2024 idinto nga inaprobaran ti House of Councillors ti Japanese Diet (parliament) idi Hunio 6, 2025. (Martin Sadongdong/Manila Bulletin//Lito Hilidon/Bannawag)
