Umuna ni Lito Paringit Hilidon ti Comon, Aritao, Nueva Vizcaya, kadagiti premiado a mannurat a padayawan ti ALVIYA Literary Foundation ita a tawen para iti Pasalip ALVIYA iti Sarita 2025.
Impangabak ni Hilidon iti Umuna a Gunggona ti saritana a “Ti Gunglo.” Inkakaubingan ni Hilidon ti nagsurat. Nagserbi nga Associate Editor ti CLSU Collegian, ti opisial a pagiwarnak ti Central Luzon State University (CLSU) iti Muñoz, Nueva Ecija. Nagserbi pay a Cultural Property Researcher iti Aritao (LGU) Tourism Office. Agdama a kameng ti Bannawag.
Impangabak met ni Jorge Richard P. Guerrero, tubo ti Laoag City, ti saritana a “Ti Impertinente” iti Maikadua a Gunggona. Tubo ti Laoag City ken nagturpos iti UP Diliman, maysa a premiado a mannurat ni Guerrero. Pakairamanan dagiti nangabakannan ti Carlos Palanca Memorial Awards for Literature. Agtrabtrabaho ita a kas Agrarian Reform Program Officer II ti Department of Agrarian Reform iti Ilocos Norte.
Ni met Michael Cordero Corpuz, maysa a mannursuro ken tubo ti Sarrat, Ilocos Norte ti nangabak iti Maikatlo a Gunggona babaen ti saritana a “Ti Boses Iti Isla Santa Ana.” Nagturpos iti Bachelor of Arts in English Literature iti Divine Word College of Laoag. Dati nga instruktor iti Mariano Marcos State University, College of Arts and Sciences, ken agserserbi ita a mannursuro iti Sta. Rosa National High School.
Pasalip ALVIYA iti Sarita 2026, naluktan
Dua a Pangliwliwa a Gunggona ti mayawat ita a tawen. Maipaay ti umuna ken ni Abraham Aguino Jr. ti San Lorenzo, Bangui, Ilocos Norte babaen ti saritana a “Ti Ramen ti Biag.” Nagturpos iti AB Philosophy iti Saint Louis University, Baguio City ket nayaltas a kas naan-anay a padi idi 1999. Sangapulo a tawen a nagserbi a misionero iti pagilian a Zambia iti Africa. Agdama a mannursuro iti Bangui National High School.
Awaten met ni Fernando B. Sanchez ti Poblacion East, San Nicolas, Pangasinan ti maikadua a pangliwliwa a gunggona babaen ti saritana a “Napudot Dagiti Niebe iti Amerika.” Maysa a retirado a Public Schools District Supervisor (San Nicolas, Pangasinan) ken nagtakem a Vice President for Academic Affairs iti Luna Colleges iti Tayug, Pangasinan. Nagtakem a direktor ti Philippine Association of Graduate Education (PAGE) iti Region I. Agdama a presidente ti GUMIL Pangasinan.
Adda sangapulo ket siam a naisalip a sarita a nakaagsawan dagitoy lima a nangabak manipud met iti pito a napili a finalist.
Nagpaay a hurado da Cles B. Rambaud, Editor ti Bannawag; Juan Al. Asuncion, Managing Editor ti Bannawag, ken Linda Lingbaoan-Bulong, nagretiro a Senior Editor ti UP Press.
Imanmanehar ni Dr. Freddie Padua Masuli ti Pasalip ALVIYA babaen ti panangis-isponsor ni Alex Vicente Yadao ti New York City. (ALVIYA Secretariat)
