Madaman nga ipilpila ti Department of Foreign Affairs (DFA) ti diplomatic protest gapu iti napeggad a panagtignay ti China iti Scarborough (Panatag) Shoal itoy a lawas.
Daytoy ti imbutaktak ni DFA Secretary Ma. Theresa Lazaro iti maysa a seremonia a mainaig iti Philippines-Japan Reciprocal Access Agreement (RAA) a naangay idi Agosto 12.
Ngem inlawlawag ni Lazaro a masapul a paayabanda pay ti embahador ti China maipapan iti daytoy.
Segun ken ni Lazaro, masapul nga agbalin a natanang ti Filipinas ken tarigagayna nga agsubli iti diplomatiko a pannakasarita ken pannakiuman, ta daytoy ti patienna a kasayaatan nga aramiden iti daytoy a situasion.
Kasapulan ti natibker ken nainkalintegan a pagtaktakderan iti parikut iti WPS --NMC
Impaganetget ni Lazaro a masapul a sipipinget ti dua a partido a mangtungpal iti dua nga internasional a pagalagadan a nadakamat iti maysa a waragawag ti DFA -- ti 1972 International Regulations for Preventing Collisions at Sea (COLREGS) ken ti 1974 Safety of Life at Sea Convention (SOLAS).
Idi Agosto 11, linisian ti bapor ti Philippine Coast Guard (PCG) a BRP Suluan (MRV 4406) ti water cannon nga impaturong kadakuada ti bapor ti China Coast Guard (CCG) a nangitunda iti panagdinnungpar ti bapor ti CCG ken ti bapor met laeng ti China’s People’s Liberation Army Navy (PLAN).
Inyebkas dagiti diplomatiko a komunidad iti Filipinas ti pakaseknanda iti pasamak iti Scarborough Shoal.
Kinondenar ni Embahador ti Estados Unidos iti Filipinas MaryKay Carlson ti dinadarasudos a tignay ti China a maibusor iti bapor ti Filipinas a BRP Suluan, kalpasan nga ipaskilna ti video ti napasamak iti Facebook account-na.
Binabalaw met ni Japanese Ambassador to Manila Endo Kazuya ti inaramid ti China a nangitunda iti panagdinnungpar dagiti bapor ti China a namagpeggad kadagiti tripulantena.
Inyebkas ni European Union Ambassador Massimo Santoro ti pannakaseknanna iti pasamak, ket inggunamgunamna ti natalna a pannakarisut ti parikut a maitunos iti internasional a linteg kas iti UNCLOS (United Nations Convention on the Law of the Sea) ken iti 2016 Arbitral award. (Raymund Antonio/Manila Bulletin//Lito Hilidon/Bannawag)
