Patien ti Majority Leader ti Kamara a ni Ilocos Norte 1st district Rep. Sandro Marcos a saan pay a panawen a pagsasaritaan ti singasing a panangbukel iti constitutional convention (Concon).
Daytoy ti kinuna ni Rep. Marcos iti pannakayawat ti 2026 National Expenditure Program (NEP) iti Kamara idi Agosto 13, idi masaludsod maipapan iti ConCon.
Ti Concon ti maysa a wagas ti panangamendar iti Konstitusion.
Segun ken ni Marcos, badiet pay laeng ti pagsasaritaanda ket saan koma a rumbeng a maiballaet ti maipapan iti ConCon ta saanna pay a panawen daytoy.
Mapukpukaw a nobia, nasarakan iti Pangasinan
Inyawat ni Department of Budget and Management (DBM) Secretary Amenah Pangandaman ti 2026 NEP nga aggatad iti ₱6.793 a trilion ken ni House Speaker Martin Romualdez idi Mierkoles, Agosto 13. Daytoy ti mangirusat iti panangtaming ti Kamara iti nailian a badiet.
Kinuna ni Nueva Ecija 1st district Rep. Mikaela "Mika" Suansing a daulo ti Committee on Appropriations, a rugianda a tamingen ti NEP inton Lunes, Agosto 18.
Ti NEP ti pagibatayan ti agbalin a General Appropriations Bill (GAB).
Manamnama a maidatag ti 2026 GAB iti maikatlo ken maudi a pannakaibasa daytoy sakbay nga ag-adjourn ti Kamara inton Oktubre 10.
Idi Agosto 11, insingasing ni Deputy Speaker Antipolo City 1st district Rep. Ronaldo "Ronnie" Puno a kasapulan a maamendaranen ti Konstitusion tapno agbalin a nalawag dagiti saan a nalawag a probision ti linteg kas iti sao a "forthwith" iti proseso ti impeachment.
Insingasing ni Puno a maatur dagitoy babaen ti ConCon, ket saan ketdi a babaen ti constituent assembly (Con-Ass). (Ellson Quismorio/Manila Bulletin//Lito Hilidon/Bannawag)
