Pinirmaan ni Presidente Ferdinand Marcos Jr. idi Agosto 13 ti pannakaitantan ti 2025 Barangay and Sangguniang Kabataan Elections (BSKE), manipud iti Disiembre 2025, nagbalin a Nobiembre 2026.
Kagiddan daytoy ti pannakailayon ti termino ti panagakem (term of office) dagiti opisial ti barangay ken SK iti uppat a tawen.
Binaliwan ti Republic Act No. 12232, a pinirmaan ni Marcos, ti agdama a tallo a tawen a termino ken agpatinggada laeng iti tallo nga agsasaruno a termino iti isu met laeng a pagsaadanda; idinto a maysa a laeng ti termino dagiti opisial ti SK.
Maibatay iti linteg, maangay ti sumaruno a BSKE inton umuna a Domingo ti Nobiembre 2026 ken ti sumaruno nga eleksion kalpasan ti uppat a tawen. Magrugi nga agakem dagiti nabotosan nga opisial iti umuna nga aldaw ti Disiembre kalpasan ti pannakapilida.
Senado, pinasingkedanna ti ₱6.793-trilion a nailian a badiet para 2026
Amin nga agdama nga opisial ti barangay ken SK ket agtalinaed iti saadda agingga a mabotosan ti sumukat wenno sumaruno kadakuada, malaksid no maikkat wenno masuspensoda gapu iti ania man a rason.
Segun iti linteg, maiparit nga agkandidato dagiti agdama nga opisial ti barangay, kasta met ti SK, nga addan iti maikatlo a terminoda, inton 2026.
Inlawlawag ni Marcos a saan a kabaelan ti Commission on Elections (Comelec) nga angayen ti BSKE inton Disiembre, idinto a dua a dakkel nga eleksion ti impatungpal ti Comelec ita a tawen: ti midterm election idi Mayo, ken ti umadani a Bangsamoro Autonomous Region in Muslim Mindanao (BARMM) elections.
Impasingked ni Marcos ti pateg ti BARRM election iti historia ti Filipinas, ta isu ti umuna a pannakaangay ti regional parliament iti Bangsamoro, a direkta a botosan dagiti umili. (Argyll Cyrus Geducos/Manila Bulletin//Lito Hilidon/Bannawag)
