Inraman ti Department of Agriculture (DA) iti programa ti gobierno a ₱20 kada kilo a bagas ket mabalinen dagiti mannalon (ti pagay) ken mangmangged iti talon, a nagmula itoy kangrunaan a taraon iti pagilian, a makagatang iti nalaka a bagas.

Iti maysa a waragawag, impakaammo ti DA a sakupenen ti programa dagiti kameng ti sektor ti agrikultura, nangrugi idi Mierkoles, Agosto 13.

Kinuna ti DA a paset daytoy ti gannuat ni Presidente Marcos Jr. a “maipaay ti nalaklaka a mabaelan a magatang a bagas kadagiti agpatpatanor itoy.”

Segun iti DA, makagatang dagiti mannalon ken mangmangged iti talon agingga iti 10 a kilo a bagas a sag-₱20 kada kilo iti kada bulan wenno 50-kilo a sako tapno masakupan ti lebbenda a bagas manipud Agosto agingga iti Disiembre.

Nasional

Senado, pinasingkedanna ti ₱6.793-trilion a nailian a badiet para 2026

Tapno makualipikar iti nasao a programa, nasken nga agparehistro dagiti mannalon ken mangmangged iti DA’s Registry System for Basic Sectors in Agriculture (RSBSA). Masapul met a ti mannalon ket dua nga ektaria wenno nababbaba ti taltalonenna.

Segun iti datos ti RSBSA, namnamaen ni DA Secretary Francisco Tiu Laurel a mabenepisiaran iti programa ti mapan a lima a milion a mannalon ken mangmangged.

Kinuna ti DA a mangipasdekda kadagiti puesto ken booth ti Kadiwa ng Pangulo (KNP) manipud iti Food Terminal Inc. (FTI) tapno maiwaras ti ₱20/kilo a bagas kadagiti bodega ti National Food Authority (NFA).

Iti agdama, adda 18 a bodega ti NFA iti entero a Central ken Northern Luzon a mangilaklako iti nalaka a bagas.

Tapno ad-adda pay a mapaadu ti mabenepisiaran, kinuna ni Tiu Laurel a mairamanton iti programa dagiti dadduma a paset ti pagilian ken kadagiti pay RSBSA-registered a mangngalap.

Kinunana a mabenepisiaran ti programa ti dandani tallo a milion a mangngalap apaman a maipakat daytoy.

Dati a lilmitado laeng ti programa a ₱20/kilo a bagas kadagiti senior citizens, solo parents, persons with disabilities (PWD), Pantawid Pamilyang Pilipino Program (4Ps), ken, idi agangay, kadagiti minimum wage earner. (Dexter Barro II/MANILA BULLETIN)