Inanamongan ti Armed Forces of the Philippines idi Agosto 14 ti ₱40 a bilion a pondo para iti nabaliwan a modernization program a nailatang iti singasing a 2026 national budget.
Iti maysa nga statement, kuna ti AFP a daytoy a pondo ti nalawag a mangipakita iti kinapinget ti pagilian a mangsalaknib iti soberaniana iti baet ti kumarkaro a risiris iti sangalubongan, nangruna iti West Philippine Sea (WPS).
Imparang ti Department of Budget and Management (DBM) ti singasing a Fiscal Year (FY) 2026 National Expenditure Program (NEP) nga aggatad iti ₱6.793 a trilion ken ni Presidente Marcos Jr. idi Agosto 12.
Maibatay iti 2026 national budget, makaala ti sektor ti depensa iti ₱430.87 a bilion, a mangipakita iti ₱51.98 a bilion a ngimmatuanna manipud idi 2025 nga aggatad iti ₱378.89 a bilion. Mairaman iti badiet ti ₱40 a bilion para iti napabaro nga AFP modernization program.
Senado, pinasingkedanna ti ₱6.793-trilion a nailian a badiet para 2026
Segun iti DBM, naingato ti badiet ti AFP tapno mapapigsa ti kabaelan ti pagilian iti panangdepensana iti daga (₱116.31 a bilion), tangatang (₱54.10 a bilion), ken taaw (₱53.73 a bilion).
Namin-anon a naitantan ti modernization program ti AFP iti napalabas gapu iti kinakurang ti badiet, ngem ti dakdakkel a badiet a nailatang para iti 2026 ti mangipakita iti tarigagay ti gobierno a papigsaen ken pasayaaten ti depensa ti pagilian. (Martin Sadongdong/Manila Bulletin//Lito Hilidon/Bannawag)
