Kinemmeg dagiti kameng ti Women and Children’s Protection Desk ti Pampanga Police ken Department of Social Welfare and Development-Central Luzon (DSWD 3) idi Agosto 13, ti maysa nga Amerikano a naireklamo gapu iti maipagarup a panangabusona kadagiti ubbing.
Segun kadagiti nagreklamo, pisikal, verbal, ken psychological a panangabuso ti sinagrapda iti sidong ni Pastor Jeremy Ferguson a daulo ti social welfare and development agency (SWADA) iti Mexico, Pampanga.
Naarestar ni Ferguson, a direktor ti New Life Baptist Church of Mexico, Pampanga, Inc. (NLBCMPI) a masarakan iti District 12, Barangay Pandacaqui gapu iti panaglabsingna iti Republic Act 7610, wenno ti Special Protection of Children Against Abuse, Exploitation and Discrimination Act.
Impaulog ni Sekretario ti DSWD Rex Gatchalian ti cease-and-desist Order (CDO) idi agsapa ti Mierkoles, Agosto 13, kontra iti NLBCMPI, nga inted iti isu met la nga aldaw dagiti kameng ti DSWD-3 nga idadauluan ni Director Venus Rebuldela.
Retirado a heneral, nakemmeg gapu iti panangsugsog a mangtippuog iti gobierno
Naarestar ni Ferguson walo nga oras kalpasan a naisalakan dagiti 156 nga ubbing manipud iti kustodiana gapu iti reklamo a pisikal a panangabuso, verbal abuse, psychological abuse, saan nga umno a panangusar kadagiti pondo, ken saan a panangtungpal iti pagaladagan ti Registration, License to Operate and Accreditation ti DSWD.
Dagiti ubbing -- 78 a lallaki ken 78 a babbai -- ket naipan iti kustodia ti Reception and Study Center for Children ti DSWD iti Lubao, Pampanga. (Jose Cielito Reganit/PNA//Lito Hilidon/Bannawag)
