Inawagan ni Senador Francis “Kiko” Pangilinan a kas ‘fake news’ dagiti maibagbaga ken maiwarwaras a saan a madusa wenno maidarum dagiti menor de edad a nakaaramid iti krimen babaen ti Juvenile Justice and Welfare Act of 2006.
Iti interpellation-na iti privilege speech ni Senador Robinhood Padilla idi Mierkoles, Agosto 13, naladingitan ti senador iti epekto ti fake news ken disinformation iti pannakaawat ti publiko kadagiti probision ti linteg.
Ikalkalikagum ni Padilla ti pannakaibaba ti minimum age of criminal liability iti 10 manipud iti agdama a 15-anios.
"Umuna iti amin, makikaykaysakami kenkuana (Padilla) maipapan iti banag a kasapulan ti hustisia nangruna kadagiti biktima ti krimen wenno kadagiti kaso dagiti menor de edad a mairamraman kadagiti kriminal nga aramid,” kinuna ni Pangilinan.
Retirado a heneral, nakemmeg gapu iti panangsugsog a mangtippuog iti gobierno
"Rumbeng laeng a dagiti makabasol ket agsungbat ket nalabit adu met ti kasapulan a malawlawagan maipapan iti no ania dagiti aktual a probision wenno posible a panangipatungpal iti linteg, ken tapno maidilig dagitoy iti saan a maiparbeng wenno iti disinformation,” innayonna.
Inlawlawag ti senador a nangsurat iti linteg idi 2006 ken dagiti pannakabalbaliwna idi 2013, a ti Juvenile Justice Law ket mangipaay iti dusa kadagiti menor de edad nga agaramid iti krimen.
“Ti imbaga ti ubing iti (maysa) a video a kunana, ‘naaramidmi ti krimen gapu ta ammomi a saankami a madusa’ ket biddut nga impormasion,” inlawlawag ni Pangilinan. Impaganetgetna a naibalud dagiti nangpapatay iti agkabsat a Maguad nupay inaramidda ti krimen idi menor de edadda pay laeng.
“Iti sabali a pannao, saan nga agpayso ti maibagbaga a gapu ta menor de edad ket saan a mabalin a madusa, agsipud ta dagidiay dua a nairaman iti Maguad killings ket nadusa ket sibabaluddan,” kinuna ti senador.
“Rebbengna a maipaayan iti hustisia dagiti biktima ti nakaam-ames a krimen nga aramid ti menor de edad, ngem saan nga agpayso a no kunaen a no menor de edad ket masapul a mawaywayaan, gapu ta umuna iti amin, no winayawayaam dayta, maikontra dayta iti linteg ket rebbengna a madusa dagiti mangwayawaya kadagiti nagbasol a menor de edad." impaganetgetna.
Inlawlawag ni Pangilinan a dagiti menor de edad a nakaaramid iti nadagsen a pagbasolan kas iti panangrames ken pammapatay, ket nasken nga adda iti mandatory confinement a saan a nababbaba ngem maysa a tawen. Mabalin a mapaatiddog daytoy iti tallo a tawen wenno nasursurok pay, depende iti pangngeddeng ti korte.
Dinakamat ti senador ti naan-anay a pannakaipatungpal ti Juvenile Justice Law iti Valenzuela City idi ti mayorna ket ni Senador Win Gatchalian.
Inbinglayna a 70 a porsiento kadagiti ubbing a naglabsing iti linteg a nagdalan iti rehabilitation and diversion program ket nagbalin a normal ti panagbiagda.
Idinto a nagyaman ken ni Padilla gapu iti gundaway a napagsasaritaan ti Juvenile Justice Law, ingganetgetna a ti 10-anios ket ubing unay tapno maibilang a kriminal gapu ta adda dagiti probision a mangipasidong kadakuada iti mandatory confinement iti babaen ti agdama a linteg.
Kinuna ni Pangilinan, kangrunaan nga autor ti linteg, a ti panangsuportar ni Padilla ket mangpapigsa kadagiti agtultuloy a panangisayangkat tapno masigurado a ti rehabilitasion, edukasion, ken reintegration—saan a dusa laeng—ket agtalinaed iti bugas ti sistema ti hustisia dagiti agtutubo iti pagilian. (Dhel Nazario/MANILA BULLETIN)
