Indagadag ti Second Congressional Commission on Education (EDCOM 2) iti gobierno nga usarenda a kas katulongan dagiti local government unit (LGU) ken pribado a sektor tapno mapapardas ti pannakaipatakder dagiti siled-pagaladan ken maikkat ti panagsinnublat ti iskediul ti klase dagiti adda iti Kindergarten agingga iti Grade 3.
Segun iti Executive Director ti EDCOM 2 a ni Karol Mark Yee kalpasan ti pannakiumanna kadagiti mannursuro ken nagannak, marigatan nga agadal dagiti ubbing iti nadupudop unay ken adda perdina a siled-pagadalan.
Kinuna ni Yee a daytoy koma a parikut ti masapul a mataming a dagus.
Iti naangay a panangbista ti Basic Education Committee ti Senado maipapan iti kinaadu unay ti laonen dagiti siled-pagadalan idi Agosto 13, nagsasaritaanda ti nadumaduma a solusion iti parikut ti Department of Education (DepEd) a 165,000 a panagkurang ti siled pagadalan.
44% kadagiti Filipino, mangnamnama iti nasaysayaat a kalidad ti panagbiag iti 2026 —SWS
Segun iti paliiw ni Senador Bam Aquino a daulo ti Senate Basic Education ken co-chair ti EDCOM 2, aggigidiat dagiti gatad ken estandarte ti panagaramid iti siled-pagadalan, ta kabaelan dagiti pribado a sektor ti mangipatakder iti classroom iti las-ud ti makatawen, idinto nga agpaut iti sumagmamano a tawen dagiti proyekto ti gobierno.
Nadlaw met ni EDCOM 2 Commissioner Senador Loren Legarda a dandani madoble ti gatad dagiti proyekto ti DPWH, ket kinunana a no dagiti pribado a contractor ket kabaelanda a leppasen ti dekalidad ken nalaklaka a presiona ti proyekto, masapul a tingitingenda dagiti pricing practice dagiti contractor ti gobierno.
Tapno mataming ti panagkurang ti siled-pagadalan, indatag ni Aquino ti Senate Bill No. 121, a mangipalubos kadagti LGU ken pribado nga organisasion a mangipatakder iti siled-pagadalan a ponduan ti nailian a gobierno.
Sinuportaran daytoy ni Sen. Sherwin Gatchalian, ket dinakamatna ti naballigi a “counterparting” program ti Siudad ti Valenzuela, a nadardaras ti pannakairingpas dagiti proyekto idi nagdadanggay dagiti LGU, pribado a sektor, ken ti nailian a gobierno a nangipatakder kadagitoy. (Merlina Hernando-Malipot/Manila Bulletin//Lito Hilidon/Bannawag)
