Binabalaw ni Presidente Ferdinand Marcos Jr. ti contractor ti flood control project nga aggatad iti ₱96.4 a milion iti Bulacan, ket masapul nga ilawlawagda no apay a saan a nalpas ti proyekto.
Segun ken ni Presidente Marcos idi Agosto 15, pagpalawagenna ti St. Timothy Construction Corporation no apay a saan a nagballigi ti pannakatarimaan ti river protection structure iti Barangay Bulusan, Calumpit, a naisurat a "nalpasen" iti report, ngem saan pay met, ta awan ti naikabil ken awan naaramid a nasurok a 200 a metro a revetment, ken adu ti abut ti dike.
Ti St. Timothy Construction Corporation ti maysa kadagiti nadakamat a 15 a contractor a nakaala iti kaaduan a flood-control projects iti pagilian.
Kinuna ti Presidente a nangibaonda kadagiti diver a nangkita iti irekreklamoda a flood-control project, ket natakuatanda a dagiti diding iti sirok ti konkreto a slope protection ket nagaburan ti napuskol a pitak, isu nga imposible a makita no adda pay naitambak iti dayta.
Senado, pinasingkedanna ti ₱6.793-trilion a nailian a badiet para 2026
Inyebkas ni Marcos ti pannakapaayna iti nagbanagan ti proyekto, ket kinunana nga awan ti mapanunotna a pambar ti contractor no apay a saan a nairingpas ti proyekto.
Ti Bulacan ti kaaduan a nakaipatakderan ti flood control projects, nga addaan iti 668 a proyekto nga agbalor iti agarup ₱6.5 a bilion, uray saan a nairaman ti probinsia iti opisial a listaan ti flood-prone areas. (Betheena Unite/Manila Bulletin//Lito Hilidon/Bannawag)
