Nakiddaw iti Korte Suprema (SC) a maideklarar a kas unconstitutional ti Republic Act No. 12232 a mangilayon iti termino ti panagakem dagiti agdama nga opisial ti Barangay ken Sanggunian Kabataan iti uppat a tawen, ken mangitantan nga eleksion a naituding iti Disiembre ita a tawen, a nayalud-od inton Nobiembre 2026.
Pinirmaan ni Presidente Marcos Jr. ti RA 12232 idi Agosto 13, a nangmandar iti pannakaangay ti Barangay and Sangguniang Kabataan Elections (BSKE) iti umuna a Lunes ti Nobiembre 2026.
Maibatay iti baro a linteg, makedngan ti panagakem dagiti opisial ti barangay agingga iti tallo a termino, idinto a maysa laeng a termino kadagiti agdama nga opisial ti Sangguniang Kabataan.
Indatag ni election lawyer Romulo B. Macalintal ti petision iti SC idi Agosto 15.
Senado, pinasingkedanna ti ₱6.793-trilion a nailian a badiet para 2026
Segun ken ni Macalintal, saan nga inadal wenno napagsasaritaan a naimbag dagiti nangbukel iti linteg sakbay a naanamongan daytoy.
Kinuna ni Macalintal nga awan ti karbengan ti Kongreso a mangitantan iti naituding a petsa ti eleksion, wenno mangilayon iti termino ti asino man a nabotosan nga opisial.
Dinakamatna ti pangngeddeng ti SC, a nangideklarar a ti panangitantan iti eleksion ket maysa a nalimed a panangikalintegan tapno mayalud-od ti panagturay uray awan ti mandatoda kadagiti iturayanda.
Innayon ni Macalintal a maysa a panangabuso iti kalintegan ti Kongreso ti pangngeddengda a mangituyang kadagiti "napusgan" a daulo ti barangay kadagiti umili gapu iti panagtalinaedda iti saadda iti las-ud ti dandani makatawen nga awan ti mandatoda kadagiti botante.
Kiniddaw pay ni Macalintal a mangipaulog koma ti SC iti temporary restraining order (TRO) wenno status quo ante order (SQAO) tapno malapdan a dagus ti pannakaipatungpal ti baro a linteg.
Naipan a respondent ti Senado, Kamara, ken ti Office of the President babaen ti Executive Secretary Lucas P. Bersamin. (Rey G. Panaligan/Manila Bulletin//Lito Hilidon/Bannawag)
