Pinakdaaran ti National Tobacco Administration (NTA) ti publiko idi Agosto 15 nga illegal ti sigarilio a “Tuklaw” wenno "Thuoc Lao" iti Filipinas.
Inwaragawag ti NTA daytoy kalpasan a naaalarmar dagiti pannakabagi ti linteg iti posible nga epekto ti Tuklaw iti salun-at, kalpasan ti kasla panagkissiw dagiti nagusar iti daytoy, agraman dagiti agtutubo.
Segun ken ni NTA Administrator Belinda Sanchez, awan import license ti Tuklaw.
Indagadag ni Sanchez iti publiko nga ipakaammoda a dagus iti autoridad no adda magatangda a sigarilio a Tuklaw iti lugarda.
Maibatay iti natakuatan ti NTA, nakastrek ti Tuklaw babaen ti nadumduma a pantalan, agraman iti Zamboanga, General Santos, ken Davao iti Mindanao, ken iti Palawan. Naggapuda iti Indonesia ken Malaysia.
Articles of Impeachment kontra ken ni VP Duterte, dimmanonen iti plenario ti Kamara
Kinuna ni Sanchez a masapul a maisardeng ti panagangkat iti Tuklaw tapno masalakniban ti lokal nga industria.
Nagballaag dagiti eksperto iti epekto ti Tuklaw iti salun-at dagiti mangus-usar itoy, ta nangato unay ti nicotine daytoy a mapan a 19 a porsiento, adayo a nangatngato ngem iti maysa agingga tallo a porsiento a nikotina kadagiti gagangay a sigarilio.
Sumagmamano kadagiti epekto ti Tuklaw ti ababa a panagkissiw, panagkismay, di makontrol a panagkuti ti bagi, ken dadduma pay. (Freddie Lazaro/Manila Bulletin//Lito Hilidon/Bannawag)
