Rugianen a pagsasaritaan ti Kamara ti singasing a 2026 national budget nga aggatad iti ₱6.793 a trilion ita nga aldaw, Agosto 18, ket impanamnamada a maaprobaran ti National Expenditure Program (NEP) iti kabiitan a panawen.
Ngem saan laeng a ti pannakaanamong ti nailian a badiet ti aramiden ti Kamara iti daytoy a gundaway, no di ket, ti nabaliwan a wagas ti deliberasion a mailukat iti amin ken addan pakairamanan ti publiko.
"Ti kayatmi, saan laeng a maammuan ti publiko, no di ket mairaman ti publiko, iti panangbukel ti nailian a badiet, ta kuartada daytoy. No kuarta ti umili ti pagsasaritaan, rumbeng nga awan ti mailemmeng kadakuada," kinuna ni House Speaker Martin Romualdez.
Nangatngato iti 7.4 a porsiento ti 2026 NEP nga aggatad iti ₱6.793 a trilion, ngem iti nailian a badiet para iti 2025 nga aggatad iti ₱6.326 a trilion.
Senado, pinasingkedanna ti ₱6.793-trilion a nailian a badiet para 2026
Idauluan ni Nueva Ecija 1st district Rep. Mikaela Angela "Mika" Suansing ti Committee on Appropriations ti Kamara iti maika-20 a Kongreso.
Iti Lunes ti agsapa (Agosto 18), rugian ti Development Budget Coordination Committee (DBCC) a pagsasaritaan ti NEP.
Manamnama a dumar-ay iti taripnong dagiti daulo ken kameng dagiti ahensia a mangbukel iti DBCC a da Department of Budget and Management (DBM) Secretary Amenah Pangandaman; Department of Economy, Planning, and Development (DEPD) Secretary Arsenio Balisacan; Department of Finance (DOF) Secretary Ralph Recto; ken Bangko Sentral ng Pilipinas (BSP) Governor Eli Remolona Jr.
Ti NEP ti pagbatayan ti agbalin a GAA (General Appropriations Act).
Iti sabali a bangir, kinuna ni Senador Sherwin Gatchalian, daulo ti Senate Committee on Finance, a rugiandan ti panangbista kadagiti singasing a badiet inton Septiembre 1 para iti DBCC, ngem awan pay ti naituding nga aldaw para iti panangbista iti singasing a badiet dagiti ahensia ken departamento. (Ellson Quismorio/Manila Bulletin//Lito Hilidon/Bannawag)
