Umawat dagiti rehistrado a mangngalap iti aquaculture inputs para iti panataraken iti udang (freswater prawn) idi Agosto 18, 2025 iti Barangay Camandingan, Siudad ti Batac, Ilocos Norte. (Leilanie Adriano)

Nagiwaras ti Bureau of Fisheries and Aquatic Resources in Region 1 (BFAR-1) idi Lunes, Agosto 18, iti nasurok a dua a milion a pisos a gatad ti aquaculture inputs para iti panagtaraken iti udang ("ulang" wenno freswater prawn) kadagiti rehistrado a mangngalap iti Ilocos Norte.

"Kabarbaro para kadakami ti panagpatanor iti udang ngem maragsakankami ta imbinglay BFAR kadakami ti teknolohia," kinuna ni Ramil Casauran, maysa kadagiti nakaawat iti Barangay Pimentel iti Siudad ti Batac.

Naisayangkat ti panagiwaras bayat a rinugianen ti BFAR-1 ti panagibulos ti BFAR-1 iti udang kadagiti nadumaduma a kadandanuman iti probinsia kalpasan ti naballigi a panagtaraken iti udang babaen ti panangusar kadagiti kawayan a floating cage kadagiti small water impounding project (puttot), dan-aw, ken reservoirs.

Segun iti panagadal, nasayaat ti itatanor dagiti dadakkel a freshwater prawn kadagiti dan-aw, pupokan (cages), ken rice-fish systems, ken kasapulanda ti nadalus a danum ken napintas ti kalidadna a taraon. No umisu ti pannakaaywanna, mataengandan iti lima agingga iti innem a bulan.

Lokal

Farm specialist iti Abra, napaltogan

Kinuna ni BFAR-1 Director Rosario Segundina Gaerlan nga impasdekda ti kaunaan a hatchery ti udang iti Barangay Nanguyudan iti Paoay, Ilocos Norte, nga iti agdama ket adda iti "experimental stage."

Sakbay daytoy, adda iti Dagupan City, Pangasinan ti kaasitgan a hatchery ti udang nga imatmatonan ti BFAR.

Tapno mapapardas ti panagdur-as ti industria ti udang iti probinsia, insayangkat ti BFAR-1 ti stock enhancement activities kadagiti karayan ken dan-aw babaen ti agtultuloy a pannakaipakat ti programa a Balik Sigla sa Ilog at Lawa.

Panggep ti programa nga i-rehabilitate ti sistema ti karayan ken mapasayaat ti panagkalap babaen ti konserbasion, proteksion, ken repopulation dagiti indigenous fish species iti rehion.

Malaksid iti panagtaraken iti udang, maitantandudo pay ti panagpatanor iti tirem ken malaga kadagiti komunidad iti igid ti baybay ditoy tapno masustiner ti pagbiagan dagiti umili ken mapadur-as ti seguridad ti taraon. (Leilanie Adriano/PNA)