Mangibangon ti gobierno probinsial ti Pangasinan iti tallo a baro a kampus ti Pangasinan Polytechnic College (PPC) iti ili ti Bugallon, Umingan, ken San Carlos City.
Segun ken ni Bise Gobernador ti Pangasinan Mark Ronald Lambino, iti interview idi Lunes, Agosto 18, dagiti programa a maidiaya kadagiti baro a kampus ket maitunos iti kasapulan ti tunggal lokalidad, nga adda bassit laeng a pakaidumaanna kadagiti agdama a maididiaya iti PPC Lingayen.
"Kas pagarigan, idiay San Carlos, ti kangrunaan a pokus ket ti panangparang-ay kadagiti programa ti School of Medicine ken Health Sciences. Isu nga ad-adda a naipamaysa daytoy kadagiti programa ti siensia,” kinunana.
Segun pay ken ni Lambino, maisaysayangkat met dagiti plano a lokalisasion kadagiti dadduma pay a programa iti dua a nainayon a kampus tapno napintas ti pannakaitunosna kadagiti lugar.
Nabotosan, baro nga opisial ti Ilocos Sur Provincial Capitol Press Corps
"No addanto ti panagpapada wenno no addanto ti maipada a kurso, posible unay dayta. Ngem sigurado, i-acclimate wenno i-localize-tayo dagiti kurso a maidiaya segun kadagiti kampus," innayonna.
Kas maysa a polytechnic college, kinuna ni Lambino a maipamaysa dagiti programa iti skills-based education ken training tapno maisagana dagiti agtutubo para iti personal ken propesional a karerada kalpasan ti panagturposda.
Mangididiaya ti PPC Lingayen kadagiti programa ti Public Administration, Multimedia Arts, Special Needs Education, ken Agribusiness.
Kinuna pay ni Lambino a kas iti PPC Lingayen a dagiti incoming student kadagiti tallo a kampus, agbalin met nga scholar beneficiaries ti gobierno probinsial.
Kinuna ni Lambino a nairaman iti budget ti 2026 ti pondo para iti pannakabangon dagiti nayon a kampus, ken naisubmitir dagiti kasapulan nga ordinansa para iti panangaprobar iti Sangguniang Panlalawigan. (Hilda Austria/PNA)
