Natiliw ti maysa a lalaki gapu iti mapapati a panangpapatayna iti pito ti tawenna nga anakna a babai manipud Asingan, Pangasinan idi napan a lawas.

Segun kadagiti report, kinidnap ti suspek ken ti asawa daytoy ti biktima a maysa a Grade 2 pupil iti mismo a pagtaengan ti biktima iti Barangay Bantog, Asingan idi Agosto 14.

Nasarakan ti awanan bado a bangkay ti biktima iti baybay ti Barangay Bonuan Gueset, Siudad ti Dagupan idi Agosto 15.

Iti press briefing idi Lunes, Agosto 18, kinuna ti hepe ti Pangasinan PNP a ni Police Col. Arbel Merculo, a nangarkila dagiti suspek iti lugan a Toyota Fortuner a kukua ti maysa a negosiante iti Urdaneta City, Pangasinan.

Nakompirmar ti kinasiasino dagiti suspek babaen dagiti insubmitirda nga identification card iti negosiante nga akinkukua iti lugan.

Lokal

10 nga SPES Interns, naideploy iti LGU SANTA

Na-monitor dagiti polis ti SUV a nagbiahe iti adu a lokasion babaen ti nakainstolar itoy a Global Positioning System.

Nakemmeg dagiti suspek iti Sison, Pangasinan babaen dagiti nagkakadua a Dagupan City Police Station, Provincial Intelligence Unit, Regional Intelligence Unit, Urdaneta City PNP, Asingan PNP, ken Sison PNP.

Natakuatan dagiti polis a nasukatan ti plaka ti SUV iti peke a plaka.

Nagdalan dagiti suspek iti inquest proceedings idi Lunes, Agosto 18. Agtultuloy pay laeng ti follow-up investigation. (Liezle Basa Iñigo/MANILA BULLETIN)