Indatagen ti defense team ni Bise Presidente Sara Duterte idi Agosto 18 ti sungbatda iti motion for reconsideration (MR) nga impila ti Kamara a nangkiddaw iti pannakabalusingsing iti desision ti Korte Suprema (SC) mainaig iti pannakaideklarar nga "unconstitutional" ti impeachment complaint kontra kenkuana.
Kinompirmar daytoy ni Atty. Michael Poa, maysa kadagiti abogado ni Duterte, kadagiti kameng ti media ita nga aldaw, Agosto 19.
Segun ken ni Poa, saandan a mangted iti ad-adu a detalye kas panangannurot iti sub judice rule ken panangraemda iti proseso ti hudikatura.
Idi napan a bulan, indeklarar ti SC nga unconstitutional ti kaso nga impeachment kontra ken ni Duterte, gapu iti pananglabsing ti Kamara iti one-year bar rule ken iti kalintegan ni Duterte iti due process.
Retirado a heneral, nakemmeg gapu iti panangsugsog a mangtippuog iti gobierno
Ngem inlawlawag ti SC a saan a waswasen ti desisionda dagiti alegasion kontra ken ni Duterte, ket mabalin manen ti mangipila iti baro nga impeachment complaint inton Pebrero 6 ti umay a tawen.
Gapu iti daytoy, nangipila ti Kamara iti motion for reconsideration iti SC, ket inkalinteganda a rumbeng a mapalubosanda a mangipatungpal iti eksklusibo a karbenganda segun iti Konstitusion, a mangisayangkat iti impeachment ken iti annongen ti Senado a mangbista ken mangikeddeng iti impeachment.
Betrayal of public trust, graft and corruption, ken pananglabsing iti Konstitusion ti indatag ti Kamara a kaso ni Duterte. (Raymund Antonio/Manila Bulletin//Lito Hilidon/Bannawag)
