Kinuna ni Senate President Francis “Chiz” Escudero idi Lunes, Agosto 18, a maisayangkat ti mandatory random drug test (MRDT) para kadagiti amin nga opisial ken empleado ti maika-20 a Kongreso tapno mataginayon ti drug-free workplace.
Inaramid ni Escudero ti addang kas sungbat iti kiddaw ni Senate Minority Leader Vicente “Tito” Sotto III a maaramid a dagus ti mandatory random drug testing kalpasan dagiti report a masuspetsa nga agus-usar iti marihuana ti maysa nga staff ti Senado iti uneg a mismo ti Senado.
Segun ken ni Escudero, naki-partner ti Senado iti East Avenue Medical Center idi pay Marso 2025 tapno maisayangkat ti test kadagiti amin nga opisial ken empleado ti Senado.
“Iti agdama, iringringpasmi ti baro a policy order maipapan iti MRDT babaen ti pannakiuman iti Medical and Dental Bureau, Senate Legal Counsel, Human Resources Management Service, ken Senate Committee on Mental Wellness,” kinuna ni Escudero iti suratna.
Mapukpukaw a nobia, nasarakan iti Pangasinan
Sakbayna, nainaganan ni Nadia Montenegro, political officer iti opisina ni Sen. Robin Padilla, iti incident report ti Senate Office of the Sergeant-at-Arms (OSAA), ngem inlibakna ti alegasion, a kunana a saan nga agus-usar iti marihuana, ngem inaminna ketdi nga agus-usar iti vape.
Kalpasanna, insubmitir ni Montenegro ti panaglusulosna nga “epektibo a dagus” a kunana a para iti salun-at ti isipna ken pagimbagan dagiti annakna.
Nag-voluntary drug test met ni Sen. Juan Miguel Zubiri agraman dagiti 35 nga staff-na idi Lunes, Agosto 18, idinto a kinuna ni Sen. Raffy Tulfo nga aramidenda met dayta ken dagiti staff-na ita a Martes, Agosto 19. (Hannah L. Torregoza/MANILA BULLETIN)
