Kiniddaw dagiti kameng ti Association of Generals and Flag Officers (AGFO) ken ni Presidente Ferdinand Marcos Jr. idi Agosto 18, a mabukel koma ti maysa a grupo a mangimbestigar iti maipagarup nga irregularidad kadagiti flood control project iti entero a pagilian.
Iti maysa nga statement, inyebkas dagiti aktibo ken retirado a heneral ken flag officer (admiral iti Navy), ti panangsuportarda iti tignay ni Presidente Marcos a maibusor iti naipakadawyanen a panagkunniber, nangruna kadagiti proyekto nga impraestruktura a manglapped iti layus iti pagilian.
Segun ken ni retired major general Gerardo Layug, AGFO president ken chairman ti board of trustees, isingasingda a mangbukel ti presidente iti fact-finding body a buklen ti opisial ti gobierno ken pribado nga umili a mangimbestigar kadagiti amin nga anomalia mainaig kadagitoy a proyekto.
Ti AGFO, a buklen dagiti aktibo ken pasado nga opisial ti Armed Forces of the Philippines, Philippine National Police, Bureau of Fire Protection, Bureau of Jail Management and Penology, ken Philippine Coast Guard, ket bigbigenda a nainkalintegan ti kaudian a pammilin ni Marcos a mangimbestigar ken mangidarum kadagiti mairaman iti anomalia, tapno masalakniban ti pondo dagiti umili. (Martin Sadongdong/Manila Bulletin//Lito Hilidon/Bannawag)
