Saan a mangibaon ti gobierno ti Filipinas iti bapor ti Philippine Navy (PN) iti Bajo de Masinloc (Scarborough wenno Panatag Shoal) makalawas kalpasan ti panagdinnungpar ti dua a bapor ti China sadiay, segun iti National Maritime Council (NMC) itay Agosto 18.
Kinuna ni panakangiwat ti NMC Undersecretary Alexander Lopez a saan koma nga ibilang daytoy a kas senial ti kinatakrot, no di ket ti natibker a keddeng ni Presidente Marcos Jr. a ti diplomasia ti kangrunaan nga usaren iti panangleplep iti risiris iti West Philippine Sea (WPS).
Segun ken ni Lopez, saan a mangipatulod ti gobierno iti puersa ti PN tapno laeng sarangtenda ti maysa pay a puersa ti navy, ta iti kanito a mangipanda iti puersa ti PN iti WPS, agparang a kasla mangkarkarit wenno mangprobprokarda.
Inyunay-unay ni Lopez ti agwaywayas a foreign policy ni Marcos a ti Filipinas ket saan a bumusor ti asino man, no di ket gayyem iti amin a pagilian.
Mapukpukaw a nobia, nasarakan iti Pangasinan
Itay kallabes, inwaragawag ni Armed Forces of the Philippines (AFP) chief General Romeo Brawner Jr. ti singasingda a mangipanda iti bapor ti PN iti Bajo de Masinloc a mangkuyog kadagiti sibilian a bapor ti Philippine Coast Guard (PCG) bayat ti panagpatruliada iti WPS, ngem sinupiat ni National Security Adviser Eduardo Año daytoy, ta mabalin a mangpakaro iti risiris sadiay.
Gapuna, impakammo ti NMC a saandan nga ituloy ti singasing a joint patrol ti AFP ken PSC iti Bajo de Masinloc, ta saanda nga ammo no ania ti mabalin a mapasamak no kasta ti aramidenda.
Inkari dagiti panakangiwat ti AFP ken PCG (for WPS) a da Rear Adm. Roy Vincent Trinidad ken Commodore Jay Tarriela a sumurot dagiti ahensiada iti pangngeddeng ti NMC, ket itultuloyda a tungpalen ti annongenda a mangsalaknib iti teritorio ken soberania ti pagilian. (Martin Sadongdong/Manila Bulletin//Lito Hilidon/Bannawag)
