Kinuestionar dagiti kameng ti Kamara ti gandat ti Department of Education (DepEd) a makitinnulong iti pribado a sektor iti panangtamingda iti nabayagen a parikut iti nakurang a siled-pagadalan iti pagilian.
Inimtuod ketdi dagiti diputado no apay a saan nga usaren ti DepEd ti Special Education Fund (SEF) dagiti local government unit (LGU) tapno marisutda ti parikut.
Iti naangay a hearing ti Committee on Basic Education and Culture ti Kamara idi Agosto 18, imparang ti DepEd dagiti planoda tapno marisut ti parikut a 165,000 a panagkurang ti classroom iti pagilian.
Nairaman ditoy ti pannakayusuat ti public-private partnerships (PPP), a mangusar iti Basic Educational Facilities Fund (BEFF), kontrata iti panagabang, pannakitinnulong kadagiti LGU ken nailian nga ahensia ti gobierno ken ti pannakaisaknap ti voucher program.
Mapukpukaw a nobia, nasarakan iti Pangasinan
Segun iti DepEd, daytoy a singasingda ti mabalin a mangtaming a dagus iti panagkurang ti siled-pagadalan, ta mabalin nga aggigiddan nga agtrabaho dagiti kameng ti pribado a sektor a mangipatakder kadagiti pasilidad.
Innayon ti DepEd a saan a parikut ti nakedngan a pondoda, ta mabalin nga in-inut ti panagbayad kadagitoy.
Ngem kinuna da Batangas 1st district Rep. Leandro Leviste ken Pasig lone district Rep. Roman Romulo a daulo ti komite, a rumbeng nga usaren nga umuna ti DepEd ti LGU SEF.
Agsipud ta adda iti babaen ti DepEd dagiti school superintendent, ti DepEd ti ad-adda a makaammo iti kasapulan a siled-pagadalan iti entero a pagilian.
Segun iti dua a diputado, masapul nga usaren pay ti DepEd ti amin nga SEF, nangruna kadagiti pagadalan nga agkasapulan unay iti pasdek.
Kinuna ni Romulo a rumbeng nga usaren ti DepEd ti SEF, ket kitaenda no adda parikut iti panangusarda iti dayta, ta no kasta, masapul na amendaranda ti linteg. (Joseph Pedrajas/Manila Bulletin//Lito Hilidon/Bannawag)
