Pinagpalawag ni Senador Erwin Tulfo dagiti opisial ti gobierno iti hearing ti Senate Blue Ribbon Committee idi Agosto 19 no apay nga adu ti flood control project a naited kadagiti probinsia a saan a maibilang a flood-prone area iti pagilian.
Nagbasar ni Tulfo iti listaan nga impalgak ni Presidente Marcos Jr., ket natakuatanna a naikkan ti probinsia ti Cebu iti 414 a flood control project, Isabela nga addaan iti 341, Albay ket addaan 262, ken 252 iti Camarines Sur.
Segun ken ni Tulfo, saan a nairaman dagita a probinsia iti 10 a flood-prone a lugar kas iti Pampanga, Nueva Ecija, Pangasinan, Tarlac, Bulacan, Metro Manila, Maguindanao, North Cotabato, Oriental Mindoro, ken Ilocos Norte.
"Nagdakkel metten ti pondo ken nagadu ti flood control project kadagitoy a lugar. Lalayusen kadi dagitoy? Apay a maponduan dagitoy a lugar no saanda met a malaylayus?" kinuna ni Tulfo ken ni Sekretario ti Department of Public Works and Highways (DPWH) Manuel Bonoan.
Retirado a heneral, nakemmeg gapu iti panangsugsog a mangtippuog iti gobierno
Inanamongan ni Bonoan ti paliiw ni Tulfo ket inlawlawagna a dagiti nailatang para iti flood control project ken dadduma pay nga impraestruktura ket patas a naiwaras iti tunggal engineerng district, a 70 a porsiento kadagitoy ti nailatang kadagiti kangrunaan a programa ti DPWH, a pakairamanan dagiti national road, rangtay, ken flood control project. Ngem inaklonna nga adu kadagitoy a proyekto ti nainayon kalpasan nga inaprobaran ti Kongreso ti General Appropriations Act (GAA).
Pinalutpot ni Tulfo ni Department of Budget and Management (DBM) Secretary Amenah Pangandaman no apay nga agiruruarda lattan iti pondo a didan repasuen no kasapulan met laeng ti lugar ti maysa a proyekto.
Inlawlawag ni Pangandaman a mangiruarda laeng iti pondo segun iti naikabil iti GAA, ket innayonna nga awan ti tao a makabael a mangkita iti tunggal proyekto nga isingsingasing ti DPWH ken awan ti mandatoda a mangaramid iti daytoy.
Sinaludsod ni Sen. Rodante Marcoleta iti Commission on Audit (COA) no kabaelanda a kitaen dagiti kontraktor nga addaan iti saan a nasayaat a rekord iti panag-audit ngem makaal-ala latta iti baro a proyekto.
Kinuna ni COA Director Tracy Ann Sunico a mangbukbukel ti COA iti database dagiti blacklisted ken saan a nasayaat ti rekordda a kontraktor manipud idi 2022 agingga iti 2024, ngem aggapu latta ti pinal a datos iti DBM. (Dhel Nazario/Manila Bulletin//Lito Hilidon/Bannawag)
