Tapno agpatinggan ti panagturay dagiti pamilia ti politiko iti pagilian, tinaming dagiti senador idi Agosto 19 ti nalawlawag a kaipapanan ti "political dynasty."
Segun ken ni Senate Deputy Minority Leader Sen. Risa Hontiveros, kasapulan unay a mabukelda ti nalawlawag a depinision ti political dynasty ken maipasdek dagiti maiparit ken pagpatinggaan dagiti kameng ti pamilia nga agngayangay nga opisial ti gobierno.
Insayangkat ni Hontiveros ti maysa a public hearing para kadagiti tallo a gakat a linteg a naipila iti Senado a mangilawlawag ken mangiparit iti political dynasty. Da Sen. Panfilo “Ping” Lacson, Robinhood Padilla, ken Francis “Kiko” Pangilinan ti nangipila iti bukodda a bersion ti singasing a linteg.
Kinuna ni Hontiveros, vice chairman ti Committee on Electoral Reforms and People's Participation, a tallopulo a tawenen sipud idi naratipikaran ti 1987 Constitution a nalawag nga agkunkuna nga iparit ti gobierno ti political dynasty "kas ilawlawag ti linteg."
Senado, pinasingkedanna ti ₱6.793-trilion a nailian a badiet para 2026
Ngem segun iti sukisok ti Philippine Center for Investigative Journalism (PCIJ), 113 kadagiti 149 a siudad iti pagilian ti iturturayan dagiti political dynasty.
Kinuna ni Hontiveros nga imposible a maiparit ti political dynasty no awan ti nalawag a kaipapanan no ania ti maibilang political dynasty.
Bigbigen ni Sen. Erwin Tulfo ti kapateg ti pannakailawlawag no ania ti maibilang a political dynasty ken mangipasdek iti nalawag a pagannurotan a pagnumaran ti pagilian ken dagiti Filipino.
Segun ken ni Tulfo, ti “constitutional gap” ti yan ti parikut ket anamonganna a saan nga inlawlawag ti Kongreso no ania ti maibilang a political dynasty.
Inaklon ni Tulfo nga uray isu ket naggapu iti pamilia ti lumatlatak a politiko, ket kinunana a ti linteg mainaig iti political dynasty ket saan a panangatakar kadagiti pamilia, no di ket mangpatibker iti institusion ken mangipaay iti patas a gundaway iti panagturay.
Iti biang ni Tulfo, dagitoy dagiti saludsod a masapul a masungbatan:
1. Agingga iti ania a degree of consanguinity wenno affinity ti maibilang a dynasty?
2. Dagiti laeng kadi nabotosan (elective) a pagakman ti sakupen ti linteg, wenno mairaman dagiti nadutokan (appointive) iti pagsaadan?
3. Maipakat laeng kadi ti linteg kadagiti aggiddan nga agakem iti turay wenno mairaman dagiti agbalin a sunoda (succession)?
4. Masapul kadi a paggidiaten ti linteg para iti national ken iti local level?
Innayon ni Tulfo a sisasagana a dumngeg kadagiti kapanunotan dagit nadumaduma nga ahensia ken silulukat iti agsinnumbangir a partido. (Hannah L. Torregoza/Manila Bulletin//Lito Hilidon/Bannawag)
