Idinto a nausar dagiti dadduma nga ahensia ti gobierno ti 94-porsiento dagiti nailatang a pondoda iti umuna a pito a bulan ti 2025, a saan a nagbaliw manipud iti napalabas a tawen, agtultuloy met maud-udi ti Department of Energy (DOE) ken Department of Information and Communications Technology (DICT) iti panangbusbosda kadagiti pondoda.
Segun iti kaudian a datos manipud iti Department of Budget and Management (DBM), immabot iti ₱2.99 a trilion dagiti nairuar a notice of cash allocation (NCA) kadagiti ahensia ti gobierno idi Enero agingga iti Hulio, a 9.1 a porsiento a nangatngato ngem idi napan a tawen a ₱2.74 a trilion.
Iti daytoy a gatad, nausar ₱2.81 a trilion babaen dagiti line departament, dagiti korporasion a patpatarayen ti gobierno, ken dagiti lokal a gobierno (LGU), ket adda nabati a ₱178.2 a bilion a saan a nausar a pondo iti uneg ti pito a bulan.
Dagiti NCA ket pammalubos iti pannakairuar ti pondo manipud iti DBM a mangipalubos kadagiti ahensia ti gobierno a mangbusbos para kadagiti programa ken proyektoda. Ti nangatngato nga NCA utilization rate, mangipakita a dagiti ahensia ket mangiwarwaras kadagiti pondo ken mangipatpatungpal kadagiti proyekto iti umisu a tiempo.
Mapukpukaw a nobia, nasarakan iti Pangasinan
Ti laeng Department of Migrant Workers (DMW) ken ti Commission on Audit (COA) ti nakairekord iti 100-porsiento a utilization rate.
Ti DOE ti kababaan iti rate ti panagusar, a 63 a porsiento laeng ti nausar, wenno aganay a ₱1 a bilion laeng ti nausarna iti ₱1.7 bilion a nairuar a pondona. Ti met DICT, 64 a porsiento wenno ₱4.2 a bilion laeng ti inusarna manipud iti ₱6.5 bilion a pondona.
Ti Department of Public Works and Highways (DPWH) ti nakaawat ti kangatuan nga alokasion a ₱610 a bilion, a 94 a porsiento ti nausarna.
Ti Departamento ti Edukasion (DepEd) ti nakaawat iti maikadua a kadakkelan nga alokasion: ₱422.6 bilion, a 97 a porsiento ti inusarda. (Derco Rosal/MANILA BULLETIN)
