Plano ti Department of National Defense (DND) a pasayaaten ti pannakitinnulongna iti Australia tapno pumigsa ti puersa ti pagilian iti laksid ti kumarkaro nga idudupir ti China iti West Philippine Sea (WPS).
Nagpirma da DND Secretary Gilberto Teodoro Jr. ken Deputy Prime Minister ken Minister of Defence ti Australia Richard Marles iti maysa nga statement of intent a mangbukel iti defense cooperation agreement bayat ti maikadua a Philippines-Defense Ministers’ Meeting iti siudad ti Makati idi Biernes, Agosto 22.
Manamnama a maipinal ti defense cooperation agreement a naibatay iti kapirpirma nga statement of intent inton 2026.
Inladawan ni Marles ti relasion ti depensa ken seguridad iti nagbaetan ti Manila ken Canberra kas “fundamentally important” wenno napateg unay ta agtintinnulong dagiti dua a nasion tapno mataginayon ti talna ken kinatalged iti komplikado unayen ken agbaliwbaliw a lubong.
Mapukpukaw a nobia, nasarakan iti Pangasinan
Natibker ti plano a katulagan iti depensa, kas iti gagem dagiti dua a pagilian a dumakkel ken rumangen ti panagkaduada iti benneg ti depensa. Namunganay daytoy iti 1995 Memorandum of Understanding (MOU) iti defense cooperation dagiti dua a pagilian.
Babaen ti defence cooperation agreement, nagkaysa ti Filipinas ken Australia a mangipasdek iti defense infrastructure plan a mangiwanwan ken masurot iti pannakaipatungpal dagiti infrastructure investment kadagiti masungad a tawen.
"Sagudayen daytoy ti pakabuklan ti engagement-tayo iti depensa ngem mairaman, kas pagarigan, ti panagkomit a maaddaantayo iti tinawen a Defence Ministers’ Meeting. Ipakitana no kasano nga ad-adu pay ti maaramidan iti panagkoordinar maipapan kadagiti execises ken operational tempo iti nagbaetan dagiti pagiliantayo. Ad-adda ketdi a mabenepisiaran ti Filipinas no maipapan iti infrastructure development para iti Armed Forces of the Philippines,” kinuna ni Marles.
Iti agdama, plano ti Australia ti mangipasdek iti walo nga imprastruktura ti militar iti lima a nagduduma a lokasion iti Filipinas, segun ken ni Marles.
Simmarungkar ni Marles iti Manila ta madama ti pannakaisayangkat ti military exercise iti nagbaetan ti Armed Forces of the Philippines (AFP) ken Australian Defense Forces (ADF) a naawagan iti Exercise ALON (Amphibious and Land Operations). Nasurok a 3,600 a soldado ti Filipinas ken Australia, sabali pay ti puersa ti America ken Canada, ti makipaspaset kadagiti war games a maang-angay kadagiti lugar a pagsanayan iti aglawlaw dagiti isla ti Palawan ken Luzon a sumango iti West Philippine Sea (WPS) manipud Agosto 15 agingga iti 29.
Masaksian da Marles ken Teodoro ti sumagmamano kadagiti training exercises iti ngudo ti lawas a pakaitampokan ti ADF’s HMAs Brisbane, maysa nga air warfare destroyer; dagiti advanced aircraft a kas kadagiti F18 fighter jet, Boeing EA-18G Growler Electronic Warfare aircraft, ken ti Boeing P-8 patrol and reconnaissance aircraft, ken dagiti kameng ti infantry.
