Impalagip ti gobierno probinsial ti Ilocos Sur, babaen ti fisheries division, kadagiti mangngalap ti agdama a pannakaiparit ti panagkalap iti ipon (goby fry) tapno mapalubosan a dumakkel ken umadu daytoy a lames.
Iti maysa nga interbiu idi Huebes, AGosto 21, kinuna ni Fisheries Division chief Christopher Ian Versoza a nainget ti pannakaipatungpal ti Provincial Ordinance (PO) No. 14-03 tapno masalakniban ti ipon itoy a panawen tapno masigurado ti sustainable fisheries iti probinsia.
“Nakaawatkami iti report idi kalman a nangrugin ti goby fry season,” kinuna ni Versoza, ket indagadagna kadagiti mangngalap a dida kalapen ti ipon bayat ti peak season-na tapno masigurado ti sustainable market supply.
Iparit ti PO No. 14-03 ti panagkalap iti ipon kadagiti bulan ti Agosto ken Pebrero ket adda dusa dagiti aglabsing.
Farm specialist iti Abra, napaltogan
Ti goby (bukto, bunog, udingan), wenno gobids manipud iti pamilia a Gobiidae, ti maysa high-value a lames a pamiliar unay ken naruay kadagiti karayan ken dan-aw iti Ilokos. An-annak ti bunog wenno bukto dagiti makalkalap nga ipon.
Kadagiti adu a mangngalap nga Ilokano, ti panagkalap wenno panaglako iti ipon ti maysa kadagiti kangrunaan a pamastrekanda.
Tapno masigurado ti nawadwad a suplay ti maysa kadagiti paborito ti Ilokos a delicacy wenno naimas a taraon, bambantayan dagiti fishery law enforcer, babaen ti tulong manipud kadagiti polis, deputy fish wardens, ken dagiti Bantay Dagat, ti panawen a maiparit ti panangkalap itoy, kadagiti mabalin nga aglabsing. (Leilanie Adriano/PNA)
