Bambantayan ti Armed Forces of the Philippines (AFP) ti kaadda ti maysa a tugboat ti People's Liberation Army-Navy (PLA-N) ti China iti asideg ti BRP Sierra Madre (LS57) a nakasadsad iti Ayungin Shoal iti West Philippine Sea (WPS).
Segun ken ni AFP spokesperson for WPS Rear Adm. Roy Vincent Trinidad ita nga aldaw, Agosto 26, nasaripatpatan ti Philippine Navy (PN) ken AFP ti tugboat ti China idi Agosto 25.
Gagangay a mausar ti tugboat a pangguyod kadagiti dadakkel a bapor.
Inlawlawag ni Trinidad a saan a kabaelan ti tugboat a guyoden ti BRP Sierra Madre ta nakaangkla daytoy kadagiti koral, ngem kinunana a sisasagana latta ti militar a manglapped kadagiti puersa ti China nga agpanggep a mangguyod iti BRP Sierra Madre a nabayagen a naisadsad iti Ayungin Shoal, ken nagpaay a kas military outpost ti AFP sadiay.
Senado, pinasingkedanna ti ₱6.793-trilion a nailian a badiet para 2026
Pinaadu ti China ti puersa militar iti Ayungin Shoal sipud idi Agosto 20, kas iti coast guard, napapardas nga armado a bapor, lugan para iti tangatang, ken drone bayat a mangisaysayangkatda iti maritime exercises a buybuyaen dagiti soldado a Filipino ken marino nga adda iti BRP Sierra Madre.
Malaksid iti tugboat, nasaripatpatan ti AFP ti 13 a militia boat ti China ken dua a bapor ti CCG iti Ayungin Shoal a 2.5 nautical miles ti kaadayoda iti BRP Sierra Madre idi Lunes, Agosto 25.
Patien da Defense Secretary Gilberto Teodoro Jr. ken ni AFP Chief Gen. Romeo Brawner Jr. a gapu daytoy iti panagdinnungpar ti dua a bapor ti China iti Bajo de Masinloc (Scarborough wenno Panatag Shoal) idi Agosto 11.
Iti sabali a bangir, kinuna ni Trinidad nga agtultuloy latta dagiti resupply mission iti Ayungin Shoal iti laksid ti kaadda dagiti bapor ti China sadiay. (Martin Sadongdong/Manila Bulletin//Lito Hilidon/Bannawag)
