Iti aldaw a naipamaysa iti pannakapadayaw ti kinamaingel dagiti nailian a bannuar ti Filipinas, impamatmat ni Alex Eala ti isu met laeng a kinapingetna a mangirupir iti kabaelanna babaen ti historikal a balligina iti US Open idi Lunes, Agosto 25 (oras ti Filipinas).
Naikagumaanan ti 20-anios a ni Eala, ti top-ranked tennis player iti pagilian, ti dandani pannakapadisina iti torneo dagiti babbai a kalalaingan iti tennis iti lubong, iti 1-5 a third-set a pagkamatanna, ket kinigtotna ti maika-14 iti Women's Tennis Association (WTA) ranking a ni Clara Tauson ti Denmark, iti iskor a 6-3, 2-6, 7-6 (11), ket immabante ti Filipina iti maikadua a rikus ti Grand Slam tournament.
Minarkaan ti panagballigina ti naisangsangayan a milestone ti panagbalinna a kaunaan a Filipino iti Open Era ti tennis dagiti babbai a nangabak iti Grand Slam singles match.
Nupay rinibu a milia ti kaadayona iti taengna a Filipinas, narikna ni Eala ti di agpalta a suporta dagiti Filipino fans-iti man stand ken iti social media.
Retirado a heneral, nakemmeg gapu iti panangsugsog a mangtippuog iti gobierno
Napno iti daranudor ti napalaus a rag-o ti Grandstand iti New York, nangnangruna idi malpas ti laban a nagpaut iti dua nga oras ken 36 a minuto ket timmayaktak a sibaballigi ni Eala. Nagkayamkam met iti social media ti bara ti panagpannakkel ken pammaregta babaen dagiti mensahe para iti world No. 75 a Filipina a tennis player.
Natignay met unay, binigbig ni Eala ti aglaplapusanan a suporta ket inyebkasna ti panagyamanna iti amin a nagtalek ken namati kenkuana, nangruna kadagiti nangipaay iti panawen ket immayda a mismo nangbuya iti ay-ayamna iti stadium.
“Awan ti home tournament-ko, ket su a naaddaanak iti daytoy a komunidad ditoy US Open... agyamanak unay ta impariknada kaniak a kasla addaak iti taengko,” kinuna ni Eala, a timmayok ti kinalatakna kas maysa a kasiglatan nga agtutubo nga atleta iti lubong sumagmamano a bulan kalpasan ti balligina iti Miami Open a nangibalatanna kadagiti kampeon ti Grand Slam a da Jelena Ostapenko, Madison Keys, ken Iga Swiatek.
Makasango ni Eala iti maikadua a rikus ni Cristina Bucsa ti Spain inton Mierkoles, Agosto 27 (oras iti Filipinas). (Kristel Satumbaga-Villar/MANILA BULLETIN, Associated Press)
