Nangipilan ni Batangas first district Rep. Leandro Leviste iti pormal a reklamo kontra iti maysa a district engineer ti Department of Public Works and Highways (DPWH) gapu iti mapapati a panagpasukib, iti Hall of Justice iti Siudad ti Batangas ita a Martes, Agosto 26.
Dimteng ni Leviste iti Hall of Justice iti agarup alas 10:30 itay bigat, idinto a nasapsapa (agalas nube iti bigat) a simmangpet ni Engineer Abelardo Calalo, daulo ti Batangas 1st Engineering District Office,
Nangipila ti agdadamo a kongresista iti kaso a direkta a panagpasukib, panagkunniber ti opisial ti publiko, graft and corruption, ken panaglabsing iti Code of Conduct and Ethical Standards for Public Officials, iti saklang ti Office of the Provincial Prosecutor, kontra ken ni Calalo.
Indagadag ni Leviste ken ni Calalo ken dadduma pay nga agdama wenno dati nga empleado wenno kontraktor ti DPWH nga agbalinda a saksi ti estado tapno pagsungbatenda dagiti benepisiario iti maar-aramid a sistema ti panagkunniber.
Phivolcs: Bulkan Mayon, nagtalinaed nga aktibo
Inallukoy ni Leviste ni Calalo nga ikonsiderar daytoy ti singasingna ta patien ti kongresman nga adda matiliw a "dakdakkel nga ikan" babaen ti tulong dagiti testigo. Saan a sinungbatan ni Calalo ti singasing ni Leviste.
Kinunana a mabalin a babaen ken ni Calalo, maibutaktak ti nasaksaknap a sistema ti korupsion iti uneg ti DPWH gapu iti adu nga ammo daytoy.
Impaganetget ni Leviste a mabalin a dakdakkel ti responsibilidad ti dadduma pay ngem iti district engineer.
“Gapu ta saanak a pulos nga umawat iti kickbacks, iganetgetko a maipatungpal a nasayaat ti amin a proyekto iti umuna a distrito ti Batangas. Itultuoytayo ti panag-audit kadagiti amin a proyekto ti DPWH iti distrito, saan laeng a dagiti proyekto a pangkontrol iti layus, ken masigurado a matarimaan ti ania man a depektibo a trabaho nga awan ti mainayon a paggastossan ti gobierno,” kinuna ni Leviste.
Imbatad ni Leviste iti sinapataanna nga statement nga inlawlawag ni Calalo a situtulok dagiti kontraktor a mangted ken ni Leviste iti lima agingga iti 10 a porsiento iti ₱3.6 a bilion ti balor-na a proyekto ti distrito, a katukad ti ₱180 a milion agingga iti ₱360 a milion, tapno masuportaran dagiti educational program ti kongresman.
Kinuna ni Leviste a sisasagana ti maysa a kontraktor a mangirura iti umuna a ₱15 a milion, idinto a ti ₱3.1 milion nga indatag ni Calalo ket ibagianna ti tallo a porsiento iti ₱104-milion a proyekto, nga adda dagiti resibo a kadua ti naited a kuarta.
Impalgak ni Leviste ti mapapati nga iregularidad kadagiti project awards iti umuna a distrito – saan nga um-umno a pannakaisayangkat dagiti proseso ti bidding, a dagiti kontraktor ket mapapati a nasaksakbay a pilien ti kakomplotda a kongresman, ken panangted kadagiti SOP.
Innaganan ni Calalo ti sumagmamano kadagiti kadakkelan a kontraktor iti distrito ken ti pannakainaigda kadagiti dati nga agop-opisina (iti DPWH).
"Dakdakkel pay daytoy ngem iti ₱3.1-milion a pasukib, ta umabot iti nasurok a ₱300 a milion ti tinawen a SOP wenno kickback manipud kadagiti proyekto ti DPWH a naireserbar para iti maysa a kongresman ti umuna a distrito ti Batangas," kinuna ni Leviste.
"No immanamongak koma (a mapasukiban), agmimitingkami koma kadagiti kontraktor itoy a lawas, a mabalin a mangpataud iti ginasut a milion a pisos a kickback manipud kadagiti proyekto ita a 2025. Iti las-ud ti tallo a tawen, mabalin a lumabes iti ₱1 a bilion ti dagup a kickback a naireserbar para iti maysa a kongresman ti umuna a distrito ti Batangas," innayon ni Leviste.
Temporario a naibalud ni Calalo iti Taal police detention facility ken kinuyog dagiti personnel manipud iti Taal Municipal Police Station, a nakasuot iti bulletproof vest, idi simmangpet.
Nagtaud ti reklamo ni Leviste iti mapapati a gandat panangpasukib kenkuana iti ₱3-milion tapno saanna nga imbestigaren dagiti flood control irregularities kadagiti ili ti distritona.
Nakemmeg ni Calalo iti naisayangkat nga entrapment operation idi Agosto 22 iti district office ni Leviste bayat ti pannakaitulod ti kuarta a pagpasukib. (Danny Estacio/MANILA BULLETIN)
