Saan nga agtalek ti kaaduan a Filipino iti China, ket ibilangda ketdi daytoy a "kadakkelan a pangta" iti Filipinas, segun iti kaudian a resulta ti surbey nga insayangkiat ti OCTA Research.
Maibatay iti Tugon ng Masa a survey ti OCTA Research manipud Hulio 12 agingga 17, 80 a porsiento dagiti Filipino ti saan nga agtalek iti China, idinto a 15 a porsiento laeng ti nangyebkas iti kasungani a rikna.
Kinuna ti OCTA a ti nadarasudos a tignay ti China iti West Philippine Sea (WPS) ti kangrunaan a makagapu iti saan a panagtalek dagiti Filipino iti China.
Maysa pay kadagiti makaigapu ti pannakastrek dagiti naipuslit a produkto manipud iti China, ti yaadu dagiti krimen nga aramid dagiti Chinese national, ken ti kompetensia iti trabaho kadagiti Intsik a mangmangged.
Phivolcs: Bulkan Mayon, nagtalinaed nga aktibo
Segun pay iti surbey ti OCTA, 74 a porsiento dagiti Filipino ti mangibilang iti China a kas kadakkelan a pangta iti Filipinas, dakdakkel ngem iti 4 a porsiento a nagkuna a ti Russia wenno North Korea ti dakkel a pangta iti Filipinas. (Ruth Abbey Gita-Carlos/PNA//Lito Hilidon/Bannawag)
