Pimmusay idi kalman, Agosto 25, 2025, ni Manuel Macalma Cabie, maysa a premiado nga agricultural and fishery official ti Gonzaga, Cagayan, kas impakaammo ti pamiliana. Agtawen iti 81.
Naipasngay iti Pinili, Ilocos Norte idi Disiembre 23, 1943, nagdappat kaduana dagiti nagannak kenkuana, da Leoncio ken Felicitas, ken kakabsatna, iti rumiet-idi-ti-kabakiranna nga ili ti Gonzaga iti panangnamnamada iti naranraniag a masakbayan kas ikarkari idi ti reporma iti daga daydi Presidente Ramon Magsaysay kadagiti mannalon nga awanan iti bukod a daga a taltalonenda.
Inulilana dagiti uppat nga annakna: Mia Mirella Mae (Judge Ramses Peralta); Dr. Priscilla Ida (Police Capt. Joey Gaygay); Zena Gail (ship Captain Dominic Jay Jacinto); Eva Corazon (Scotch Crowley); Charms Flores; ken walo nga appoko; ti kabsatna a ni Julia (Dionisio Soller), ken dagiti kakaanakan ken kakabagianna iti Cagayan ken iti Ilocos Norte a pakairamanan ni Honor Blanco Cabie, mannurat ti Bannawag, ken Opinion Editor ti Manila Standard.
Sakbayna, idi Agosto 2021, pimmusay ti kaingungotna, ni dati a Zenaida Bucaneg, nagpapay a full professor iti Cagayan State University Gonzaga Campus.
Nabotosan, baro nga opisial ti Ilocos Sur Provincial Capitol Press Corps
Nagturpos ni Cabie a balediktorian iti Baoa Elementary School iti Gonzaga ken balediktorian iti sekundaria iti Cagayan Valley Agricultural College High School department iti Lallo.
Tinurposna met ti Economics iti kolehio iti probinsiana. Nakastrek kalpasanna nga empleado iti gobierno lokal ti ilina a Gonzaga a nagpaayanna idi agangay a kas Chairman ti Municipal Agriculture and Fishery Council, a nakaipaayan kenkuana idi agangay ti Oustanding Award. Malaksid itoy, naipaay pay kenkuana ti Most Outstanding Municipal Agriculture and Fishery Council Gawad Saka manipud iti probinsia ti Cagayan.
