Idatag ti abogado ni dati a presidente Rodrigo Duterte ti napigsa a pangsupiatna kadagiti ebidensia nga indiaya ti prosecution iti kaso ni Duterte a crimes against humanity iti International Criminal Court (ICC) iti maangay a confirmation of charges hearing inton Septiembre 23.
Imbinglay ni Nicholas Kaufman, abogado ni Duterte, ti plano ti depensa nga aramiden inton maangay ti confirmation of charges hearing, a mangikeddeng no rumbeng nga agtuloy iti trial ti kaso ni Duterte wenno saan.
Iti pannakiuman ti Alvin & Tourism Facebook page ita nga aldaw, Agosto 26, kinuna ni Kaufman nga ilatangna ti 30 a minuto para iti panglukat ken pangserra a bitla, ken tallo agingga iti uppat nga oras a panangtamingna kadagiti legal nga isyu ti kaso.
Inlawlawag ni Kaufman nga iti confirmation of charges hearing, ti umuna a gundaway ti prosekusion a mangiparang iti kasoda, ken ti umuna a gundaway a panangkarit ti depensa iti ebidensia ti prosekusion.
Mapukpukaw a nobia, nasarakan iti Pangasinan
Kinuna ni Kaufman a masapul a makombinsir ti prosekusion dagiti ukom nga adda umdas a pammaneknek tapno mapapati a nakabasol ni Duterte kadagiti krimen a nakaidarumanna.
Innayon ni Kaufman a ti prosekusion ti rumbeng a mangpaneknek nga awan duadua a nakabasol ni Duterte. (Raymund Antonio/Manila Bulletin//Lito Hilidon/Bannawag)
