Kayat ni Nicholas Kaufman ti makisarita iti administrasion ni Presidente Marcos Jr. tapno makitulag para iti pannakaisubli ni dati a presidente Rodrigo Duterte iti Filipinas.
Segun ken ni Kaufman, abogado ni Duterte iti kasona a crimes against humanity iti International Criminal Court (ICC), kayatna a kapatang ti gobierno ken dagiti Filipino.
"Adda kiddawko iti gobierno ti Filipinas. Agur-urayak ti awisda. Kayatkayo a kapatang ni Presidente Marcos," kuna ni Kaufman iti maysa nga interbiu ni Alvin & Tourism Facebook page idi Agosto 26.
Kinuna daytoy ni Kaufman kalpasan a kiniddawna kadagiti pasurot ni Duterte nga agtalekda iti proseso ti hustisia ken ikararaganda ti napardas a pannakawayawaya ni Duterte.
Senado, pinasingkedanna ti ₱6.793-trilion a nailian a badiet para 2026
Adda nakapila a mosion dagiti abogado ni Duterte iti Pre-Trial Chamber I (PTC-1) ti ICC--maysa ti mainaig iti panangkuestionarda iti hurisdiksion ti ICC iti kaso ni Duterte ken ti kiddawda nga interim release--a namnamaen ni Kaufman a maresolbar kadagiti sumungad a lawas.
Ni Duterte, a manamnama a sumaklang iti PTC I para iti confirmation of charges hearing a maangay inton Septiembre 23, ket nakaditene iti The Hague, the Netherlands sipud idi Marso. (Raymund Antonio/Manila Bulletin//Lito Hilidon/Bannawag)
