Insingasing ni Cagayan de Oro City 2nd district Rep. Rufus Rodriguez iti Kamara ita a Mierkoles, Agosto 27, nga ikkaten koman ti Kongreso ti travel tax, ta saan a nainkalintegan daytoy a duduoganen a pagbuisan a baklayen dagiti Filipino, nangruna dagiti pasahero ti economy class nga eroplano.
Iti panagbitla ni Rodriguez, kinunana a dagiti gagangay a Filipino -- nga isu dagiti kasapulan nga agurnong pay iti kuarta tapno makagatang iti ticket ti eroplano -- ti mangibakbaklay iti dagensen ti travel tax.
Gapu iti daytoy, insingasing ni Rodriguez nga ikkatendan ti travel tax kadagiti pasahero ti economy class nga eroplano, ngem agtalinaed daytoy kadagiti business class nga aggatad iti ₱3,000 ti travel tax-na, ken kadagiti aglugan iti first class nga eroplano nga aggatad iti ₱5,000.
Iti agdama, dagiti laeng overseas Filipino workers (OFW), ti mailaksid iti travel tax.
Retirado a heneral, nakemmeg gapu iti panangsugsog a mangtippuog iti gobierno
Nangrugi a naipatungpal ti travel tax idi panawen ni dati a presidente Ferdinand E. Marcos Sr. idi 1977 tapno agtalinaed ti foreign exchange reserve ken maponduan dagiti pasdek a maipaay iti turismo iti daydi a panawen.
Ngem kinuna ni Rodriguez a nagbaliwen ti panawen, ket nakalapsuten ti Filipinas iti kasasaad kas idi 1977, ta dimmakelen ti foreign reserves ken rimmang-ayen ti turismo ti pagilian.
Segun ken ni Rodriguez, ti panagbiahe ket nagbalinen a parikut kadagiti gagangay a Filipino, nga isu dagiti empleado iti gobierno ken pribado a sektor, estudiante, ken dagiti retirado a marigatan payen a gumatang iti air ticket-da.
Innayon ni Rodriguez a ti Filipinas ken Cambodia laengen ti pagilian iti Southeast Asia (ASEAN) ti mangipatpataw iti duoganen a buis iti panaglugan iti eroplano, a mangparigat kadagiti mangmangged a Filipino ken iti pamiliada nga agbiahe, ken saan a maitunos iti panangitandudo iti turismo iti pagilian. (Ellson Quismorio/Manila Bulletin//Lito Hilidon/Bannawag)
