Pinatgan ti National Police Commission (Napolcom) ti kiddaw a masuspenso ti maysa a police general a nangidaulo iti pannakaarestar dagiti dua a kabsat ni Julie Patidongan a nangibutaktak iti kaso dagiti mapukpukaw a mammallot ('sabungeros') idi napan a bulan iti Cambodia.
Nasuspenso iti 90 nga aldaw ni Police Brig. Gen. Romeo Macapaz maibasar iti reklamo ni Ellakim Patidongan a nagkuna a linapdan ni Macapaz ti pannakaimbestigar dagiti mapukpukaw a mammallot idi sinamsamna dagiti selponda kalpasan a maarestarda.
Ni Elakim ti nangiruruar iti kuarta manipud iti ATM account ti mapukpukaw a mammallot a ni Melbert John Santos idinto a ti kabsatna a ni Jose ti nakita iti CCTV camera a maysa kadagiti nangkuyog iti maysa pay a mammallot a ni Michael Bautista sakbay a nagpukaw daytoy.
Segun iti rekord ti polisia, nakombiktar ni Jose iti maysa a kaso a kriminal idinto a nakemmeg ni Elakim gapu iti panagusarna iti pasaporte nga addaan iti palso a nagan.
Senado, pinasingkedanna ti ₱6.793-trilion a nailian a badiet para 2026
Idi Agosto 14, indarum ni Elakim ni Macapaz, ket kinunana a binura ni Macapaz dagiti dadduma a text message iti selponna ken saanna nga insubli dagiti memory card a naglaon kadagiti maipagarup nga ebidensia mainaig kadagiti mapukpukaw a mamallot.
Segun iti resolusion nga impaulog ti Napolcom, adda merito ti argumento ni Elakim ken dinakamatda ti Napolcom Resolution 2016-002 a nagibasaranda iti pannakasuspenso ni Macapaz iti 90 nga aldaw.
Ngem inlawlawag ti resolusion ti Napolcom a ti pannakaipaay iti preventive suspension ket dina kakaipapanan a nakabasol ni Macapaz, no di ket maysa laeng a wagas a panangsalaknib ken panangsalimetmet iti kinasin-aw ti imbestigasion. (Aaron Recuenco/Manila Bulletin//Lito Hilidon/Bannawag)
