Rugian ti Kamara ti padpadaanan ti publiko a panagimbestigar iti kontrobersia dagiti flood control project inton Septiembre 2, babaen ti makunkuna nga infrastructure committee (infra comm).
Daytoy ti inawaragawag ni Bicol Saro Party-list Rep. Terry Ridon iti maysa a press conference iti Kamara ita nga aldaw, Agosto 28.
Buklen ti infra comm ti tallo a nadumaduma a komite ti Kamara: ti Committee on Public Accounts nga idadauluan ni Ridon, Committee on Good Government and Public Accountability nga idadauluan ni Manila 3rd district Rep. Joel Chua, ken Committee on Public Works and Highways nga idadauluan ni Surigao del Sur 1st district Rep. Romeo Momo Sr.
Segun ken ni Ridon, inawisda dagiti amin a resource person a nasken a maawis, kas iti Department of Public Works and Highways (DPWH), dagiti contractor a dinakamat ni Presidente Marcos a naikkan iti dakkel a flood control project. (Ellson Quismorio/Manila Bulletin//Lito Hilidon/Bannawag)
