Inanamongan ti Armed Forces of the Philippines (AFP) ti indagadag ni Department of National Defense (DND) Secretary Gilberto Teodoro Jr. a mapapardas ti pannakaipatungpal ti modernization program ti militar gapu iti dumakdakkel a pangta iti seguridad ken napardas a panagbaliw ti teknolohia.
Segun ken ni AFP spokesperson iti West Philippine Sea (WPS) Rear Adm. Roy Vincent Trinidad, suportaranda ti panggep ni Teodoro.
Kinuna ni Trinidad nga idi pay laeng 1992 nga ar-aramidenda ti planoda a pannakapamoderno ti militar.
Dinakamat ni Teodoro ti kasasaad ti Ukraine, a rinaut ti Russia, a kapilitan a pinabaroda dagiti armas ken kabaelanda kada tallo a bulan gapu iti itatanor ti baro a teknolohia a kas iti artificial intelligence (AI) ken unmanned aerial vehicles (UAV) wenno drone.
Mapukpukaw a nobia, nasarakan iti Pangasinan
Ti modernization program ti AFP, a naipaulog segun iti Republic Act 7898 idi 1995 ken napabaro babaen ti Republic Act 10349 idi 2012, ket naidasigdasig iti tallo a "horizon" manipud 2013 agingga iti 2028.
Ti Horizon 3, a maudi a paset ti programa a narugian idi 2023, ket pinabaro ni Presidente Marcos Jr. a kas “Re-horizon 3” nga addaan iti badiet a ₱2 trilion ti maipatungpal iti sumaruno a 10 a tawen.
Ipamaysa daytoy ti panaggatang kadagiti kabaruan nga alikamen kas iti multi-role fighter, missile system, ken napasayaat a command and control a ramit tapno mapapigsa ti panangdepensa ti pagilian iti baet ti kumarkaro a risiris iti rehion.
Iti singasing a 2026 national budget, ₱40 a bilion ti nailatang iti modernization program ti AFP, ad-adu iti ₱5 a bilion ngem idi 2025 nga aggatad iti ₱35 a bilion. (Martin Sadongdong/Manila Bulletin//Lito Hilidon/Bannawag)
