Kiniddaw ni Manila Mayor Francisco “Isko Moreno” Domagoso kadagiti agindeg iti Siudad ti Manila nga aramidenda koma ti umisu a panangibelleng iti basura ken liklikanda ti agibelleng kadagiti kalsada, ta mabalin a tumaud ti dakkel a parikut iti basura ken kinadalus gapu iti panagserra ti Navotas sanitary landfill.
Inwaragawag ni Domagoso daytoy a kiddaw bayat ti panaginspeksionna iti insayangkatda a panangdalus ken declogging operation iti Padre Faura iti suli ti Taft Avenue ita nga aldaw, Agosto 28, a kaduana ni Vice Mayor Chi Atienza ken ti Metropolitan Manila Development Authority (MMDA).
Kinuna dagiti opisial a napateg daytoy nga insayangkatda tapno maksayan ti peggad ti panaglayus iti lugar no napigsa ti tudo, kangrunaan kadagiti kalsada ti Manila.
Personal nga ininspeksion ni Domagoso ti operasion ken dinagadagna dagiti residente a taginayonenda koma ti kinadalus ken makikoordinarda kadagiti lokal nga autoridad tapno masigurado a saan a masullatan dagiti pagnaan ti danum.
Kasapulan ti natibker ken nainkalintegan a pagtaktakderan iti parikut iti WPS --NMC
Pinalagipan ni Domagoso ti publiko a ti basura ti siudad ket maipan itan iti San Mateo landfill iti probinsia ti Rizal.
Gapu iti daytoy, binalakadan ni Domagoso dagiti agindeg iti Manila nga urnongenda a nasayaat dagiti basurada ken urayenda ti trak ti basura, ket saanda nga agilebben iti kalsada ta mabalin a mangsullat dagitoy kadagiti pagnaan ti danum ken mangpakaro iti panaglayus no napigsa ti tudo. (Diann Calucin/Manila Bulletin//Lito Hilidon/Bannawag)
