Impila ni Cavite 1st District Rep. Jolo Revilla ti House Bill (HB) No. 85 wenno “Baon Para sa Iskolar ng Bayan Act” nga agkalikagum a mangipaay iti balon para kadagiti amin nga estudiante iti para publiko a pagadalan manipud Kindergarten agingga iti Grade 12.
Kinuna ni Revilla nga adu nga agtutubo nga agad-adal ti dandani di makasurot kadagiti leksionda gapu iti bisin ken malnutrision.
Babaen ti HB No. 85, umawat dagiti estudiante manipud Kindergarten agingga iti Grade 8 iti ₱1,000 iti tinawen, idinto a dagiti estudiante iti Grades 9 agingga iti 12, umawatda iti ₱2,000 iti tinawen. Ti Departamento ti Edukasion (DepEd) ti mangidaulo iti programa ken mangaramid iti sistema ti panangmonitor tapno masigurado ti umno a pannakaiwaras ken pannakatungpal ti Data Privacy Act.
Inlawlawag ni Revilla a ti gakat ket simple ngem makatulong kadagiti estudiante a mangipamaysa iti panagadalda iti laksid ti panagparikutda iti kuarta.
Senado, pinasingkedanna ti ₱6.793-trilion a nailian a badiet para 2026
“Maraming estudyante ang pumapasok nang walang baon at nag-aaral nang gutom dahil sa hirap ng buhay. Ang panukalang ito ay magbibigay sa kanila ng sapat na tulong para matiyak na may lakas at konsentrasyon sila habang nag-aaral,” kinunana.
(Adu nga estudiante ti sumsumrek iti eskuela nga awanan iti balon ket agad-adalda a mabisin gapu iti kinapanglaw. Daytoy a gakat ket mangipaay kadakuada iti umdas a suporta tapno masigurado nga addaanda iti pigsa ket maipasnekda ti panagadalda.)
Dinakamat ni Revilla a dagiti internasional a panagadal, agraman dagiti report manipud iti UNESCO, ipakitada no kasano a ti bisin gapu iti kinapanglaw direkta nga apektaranna ti academic performance, pannakipaset iti siled-pagadalan, ken panagpokus iti ad-adalenna.
“No masiguradotayo nga adda balon ti tunggal estudiante, makissayan ti bilang dagiti agtutubo a mapilitan nga agsardeng nga agbasa gapu iti kinakurang ti gastuenda,” innayonna.
Malaksid iti daytoy, panggep ti gakat ti mangkomplemento kadagiti dadduma pay a programa ti gobierno kas iti school-based feeding initiative ken ti Pantawid Pamilyang Pilipino Program (4Ps).
Inggunamgunam ni Revilla a ti stipend ket saan a nairanta a mangsukat kadagiti agdama a benepisio no di ket tulonganna dagitoy.
Impaganetgetna a ti panagpuonan iti edukasion ti kasasamayan a wagas tapno madadael ti siklo ti kinapanglaw ket mabangon ti ad-adda a patas a kagimongan.
"Ti edukasion ti dakkel a equalizer, ket ti bisin saan koma a pulos a lapped iti panagsursuro. Babaen ti ‘Baon Para sa Iskolar ng Bayan Act,’ agpuonantayo kadagiti arapaap dagiti annaktayo ken ti masakbayan ti pagiliantayo," kinunana.
