Inyebkas ni Senador Francis “Kiko” Pangilinan ti panangsuportana iti pannakabuangay ti agwaywayas a gunglo a mangimbestigar kadagiti maipagarup a naanomalia a flood control project a trilion a pisos ti balorda.
Iti maysa nga interbiu iti Bombo Radyo Baguio idi Agosto 28, inyunay-unay ni Pangilinan ti kinapateg ti transparensia ken pannakadusa dagiti nakabasol tapno masigurado nga umisu ti pannakagasto ti pondo ti umili ken masalakniban dagiti komunidad a nalaka a malayus.
Suportaran daytoy ti impila ni Senator Vicente Sotto III a Senate Bill (SB) No. 1215 a mangisingasing iti pannakabuangay ti Independent People’s Commission (IPC) a mangibestigar kadagiti anomalia kadagiti amin a proyekto ti gobierno nga impraestruktura.
Insingasing ni Pangilinan a dagiti mararaem a tao koma ti mangidaulo iti mabukel a gunglo, kas kada dati nga Ombudsman Conchita Carpio-Morales, dati a sekretario ti Department of Public Works and Highways (DPWH) Rogelio Singson, ken ni Baguio City Mayor Benjie Magalong.
DOH, namakdaar iti posible a pannakadangran iti Traslacion
Suportaran ni Pangilinan ti panangtingiting ni Presidente Marcos kadagiti ghost flood control project, ket kinunana a rumbeng a madusa dagiti tao a nagtakaw babaen dagitoy a proyekto. (Dhel Nazario/Manila Bulletin//Lito Hilidon/Bannawag)
