Nangipaulog ni Presidente Ferdinand “Bongbong” Marcos iti Executive Order (EO) No. 93 a mangsuspenso iti panagangkat kadagiti regular ken nasayaat ti pannakakiskisna a bagas iti uneg ti 60 nga aldaw.
Mangrugi daytoy manipud Sept. 1 ken agpatingga inton Oct. 30 ita a tawen.
Babaen ti EO 93 a napetsaan iti Agosto 29, kinuna ni Marcos a ti pannakaisardeng ti panagangkat iti regular ken nasayaat ti pannakakiskisna a bagas ket naibatay iti rekomendasion ti Department of Agriculture (DA) tapno masalakniban ti sektor ti agrikultura iti pagilian.
“Babaen ti panangirekomendar ti DA, masuspenso ti panagangkat iti regular a nakiskis ken nasayaat ti pannakakiskisna a bagas. Saan a masakupan daytoy a suspension ti panagangkat kadagiti special variety a saan nga imulmula dagiti lokal a mannalon,” kinuna ti Marcos.
'Dupax 7,' panggep nga i-cite for contempt ti Nueva Vizcaya RTC
Malagip nga inwaragawag ti Presidente ti pannakasuspenso ti panagangkat iti bagas idi Agosto 6 bayat ti ibibisitana idiay India.
Maipatungpal ti 60 nga aldaw a rice import suspension tapno masalakniban dagiti lokal a mannalon manipud iti panagbaba ti presio ti irik bayat ti panagaani.
Nupay kasta, kinuna ni Marcos a no kasapulan, mabalin a mapaababa wenno mapaatiddog ti panawen ti suspension babaen ti rekomendasion ti DA, Department of Economy, Planning, and Development (DEPDev), ken ti Department of Trade and Industry (DTI).
Naibilin iti DA, DEPDev, ken DTI ti panagtataripnongda iti uneg ti 30 nga aldaw manipud pannakaipatungpal ti EO tapno matingitingda ti epekto ti pannakasuspenso ti panagangkat iti bagas iti suplay ken presio ti bagas iti pagilian.
Nabilin pay kadagiti tallo nga ahensia a mangidatagda iti joint recommendation iti Presidente, babaen ti Executive Secretary, iti las-ud ti 15 nga aldaw manipud panagtataripnongda.
Segun iti EO, impadamag ti DA idi Agosto 8 ti “napalalo a panagbaba ti presio ti bagas iti entero a merkado” kas resulta ti napigsa a produksion ti lokal a bagas iti nasapa a paset ti tawen ken ti panagsangpet dagiti adu nga imported a bagas kadagiti napalabas a bulan gapu iti pannakakissay ti taripa dagitoy.
“Segun iti DA, kasapulan a masuspenso ti panagangkat iti regular a nagiling ken nasayaat ti pannakagilingna a bagas iti uneg ti 60 nga aldaw, a maigiddan iti panaagani, tapno makaakomodar ti domestic market ti lokal a suplay, mapatalged ti presio, ken matulongan dagiti mannalon a Filipino a mangilako kadagiti irikda iti patas ken nainkalintegan a presio,” kinuna ti EO.
Ti Republic Act 12078, Section 3, ipaayanna iti bileg ti Presidente a mangsuspenso wenno mangiparit iti panagangkat iti ad-adu pay a bagas iti limitado a panawen ken/wenno naikeddeng a kaadu tunggal adda nalabes a suplay ti imported wenno lokal a bagas nga agresulta iti napalalo a panagbaba ti lokal a presio ti bagas.
Pinusgan ti Chief Executive ti DA, iti pannakitinnulong ti Bureau of Customs (BOC) ken ti DTI, a dagus a mangipaulog iti implementing guidelines, a pakairamanan ti pannakipaset ken koordinasion dagiti maseknan nga ahensia, kasta met dagiti enforcement and monitoring mechanisms, tapno masigurado ti naballigi a pannakaipatungpal ti bilin.
(Betheena Unite/Manila Bulletin)
