Panggep ni Presidente Marcos Jr. nga ipaulog ti maysa nga executive order (EO) a mangbukel iti agwaywayas a gunglo a mangimbestigar kadagit anomalia iti Department of Public Works and Highways (DPWH), nangruna ta adda latta masukalan nga anomalia uray iti singasing a 2026 national budget.
Iti maysa nga interbiu iti Pasay City ita nga aldaw, Septiembre 1, kinuna ni Presidente Marcos a daytoy ti agpaay a kas "investigative arm" ti administrasion a mangtingiting kadagiti report ti anomalia ken mangirekomendar iti wagas tapno madusa dagiti nakabasol.
Nupay saanda pay a natinong dagiti agbalin a kameng ti gunglo, kinuna ni Marcos a pampanunotenna nga ipasdek ti maysa a gunglo a pagkamengan ti nadumaduma a tao kas iti abogado, prosecutor, ken forensic investigators, a makabael nga agtignay nga agwaywayas iti panangtingitingda kadagiti anomalia.
Saan pay nga imbutaktak ti presidente no asino dagiti mabalin nga agkameng iti gunglo, ngem inyunay-unayna a ti kinasaririt ken kinaagwaywayas ti pagibasaranna iti panangdutok kadagiti agbalin a kameng ti gunglo. (Argyll Cyrus Geducos/Manila Bulletin//Lito Hilidon/Bannawag)
