Maangay iti International Criminal Court (ICC) iti The Hague, Netherlands, manipud iti Sept. 23 agingga iti 26 dagiti bista (pannakadengngeg) iti pannakapatalged no adda napigsa a pagbatayan a ni dati a presidente Rodrigo Duterte, pudno nga adda inaramidna a krimen a maibusor iti adu a sibilian a tattao (crimes against humanity).
Iti pakaammo a nailanad iti website ti ICC, naammuan a mangrugi ti panakabista ti kaso ti dati a presidente iti alas 9:30 iti bigat ti Septiembre 23 (oras iti Netherlands). Iti kastoyto met laeng nga oras a mangrugi dagiti bista iti Sept. 24, ken 25 iti Courtroom 1 ti ICC.
Mabuya wenno mai-livestream dagiti bista iti website ti ICC, ngem maisanud iti 30 a minuto tapno masalakniban dagiti sensitibo nga impormasion maipanggep iti kaso.
Daytoy a bista iti pannakapatalged dagiti darum ket isu ti pakaikeddengan no ti kaso kontra iti presidente ket rumbeng a mayuli iti korte tapno mausig daytoy.
Senado, pinasingkedanna ti ₱6.793-trilion a nailian a badiet para 2026
Kinuna ni Nicholas Kaufman, pangulo dagiti abogado ni Duterte, nga iti nasao a bista, nasken a maallukoy dagiti kameng ti prosekusion dagiti ukom (hues) nga ”adda umdas a pagbatayan a ti maatap a nagbasol, nga itoy a kaso, isu ti dati a presidente, ket naaramidna dagiti krimen, a kas ipabpabasol ti prosekusion” ket iti kasta, mausig ti dati presidente iti korte. (Raymund Antonio, Manila Bulletin/ Cles B. Rambaud, Bannawag)
