Ti maysa a low-pressure area (LPA) ken napapigsa nga abagat (southwest monsoon) ti mabalin a mangyeg iti naiwaras a tudo ken bayakabak iti nadumaduma a paset ti pagilian itoy a lawas, segun iti Philippine Atmospheric, Geophysical and Astronomical Services Administration (PAGASA) ita nga aldaw, Septiembre 1.
Itay 3:00 ti parbangon, nasaripatpatan ti PAGASA ti LPA iti 695 a kilometro iti daya ti Daet, Camarines Norte.
Segun iti PAGASA weather specialist a ni Daniel James Villamil, bassit ti posibilidadna nga agbalin a bagyo wenno tropical cyclone ti LPA iti las-ud ti 24 nga oras, ngem mabalin nga agpa-amianan a laud ken aglabas iti Luzon kadagiti mapasungad nga aldaw.
Inton Martes, Septiembre 2, naiwaras ken napigsa a tudo ti marikna iti Central Luzon, Metro Manila, Cavite, Laguna, Batangas, Rizal, Quezon, Oriental Mindoro, Occidental Mindoro, Marinduque, Romblon, Palawan, ken Visayas.
Senado, pinasingkedanna ti ₱6.793-trilion a nailian a badiet para 2026
Inton Mierkoles, Septiembre 3, mabalin a sumardeng ti tudo iti Central ken Eastern Visayas, ngem naiwaras ken napigsa a tudo ti marikna iti Ilocos Region, Cordillera Administrative Region, Central Luzon, Metro Manila, Cavite, Laguna, Batangas, Rizal, Quezon, Oriental Mindoro, Occidental Mindoro, Marinduque, Romblon, Palawan, Western Visayas, ken Negros Island Region.
Pinakdaaran ti PAGASA ti publiko nga agridamda kadagiti posible a panaglayus ken panagreggaay, nangruna no napigsa ti tudo. (Ellalyn De Vera-Ruiz/Manila Bulletin//Lito Hilidon/Bannawag)
