Inanamongan dagiti Senador idi Agosto 31, ti pannakadutok ni Secretary Vince Dizon a kas baro a daulo ti Department of Public Works and Highways (DPWH).
Nadutokan ni Dizon kalpasan nga inawat ni Presidente Marcos Jr. ti panaglusulos ni Sec. Manny Bonoan mangrugi ita nga aldaw, Septiembre 1, bayat a maar-aramid ti pannakaimbestigar dagiti mapagduaduaan a flood control project.
"Kablaawanmi ni Dizon, ken ikarkararagmi ti panagballigina iti panangidaulona iti DPWH, ta dakkel dagiti karit a sarangtenna kasta met ti gundawayna a mangbalbaliw iti ahensia," kuna ni Senate President Francis “Chiz” Escudero.
Innayon ni Escudero a sisasagana ti Senado a tumulong iti panagbalbaliw nga ipatungpal ni Dizon tapno masigurado ti naanayas a pannakaipatakder dagiti proyekto ti ahensia.
Senado, pinasingkedanna ti ₱6.793-trilion a nailian a badiet para 2026
Kinablaawan met ni Sen. Joseph Victor “JV” Ejercito ni Dizon iti pannakadutokna, a pinakdaaranna daytoy a narigat ti akmenna a mangisubli iti panagtalek ti publiko iti nailumlomen a DPWH.
Segun ken ni Sen. Panfilo “Ping” Lacson, a nangibutaktak iti panagkunniber kadagiti flood control project ti gobierno, narigat ken nasayaat ti desision nga inaramid ti Presidente iti panangdutokna ken ni Dizon a sukat ni Bonoan kas DPWH secretary.
Kuna ni Sen. Sherwin Gatchalian a nasayaat ta ni Dizon ti nadutokan a mangimaton iti DPWH ta maysa nga "action man" ken nalinteg a tao daytoy. (Hannah L. Torregoza/Manila Bulletin//Lito Hilidon/Bannawag)
