Kasla gagangay a mangted dagiti contractor iti donasion kadagiti kandidato iti eleksion.
Naibutaktak iti budget hearing ti Commission on Elections (Comelec) nga inangay ti House Committee on Appropriations idi Septiembre 1, a di nababbaba ngem iti 31 a contractor ti posible a nangidonar kadagiti kandidato idi eleksion iti 2022.
Pinalutpot ni Marikina Citty 2nd district Rep. Miro Quimbo daytoy nga impormasion manipud ken ni Comelec Chairman George Garcia idi masaludsod ti diputado daytoy.
Segun ken ni Garcia, idi Agosto 30, addan nakitada a 31 a posible a contractor kadagiti amin a nagngayangay iti national position, ket saan pay a nalpas ti panangtingitingda.
Phivolcs: Bulkan Mayon, nagtalinaed nga aktibo
Idi 2022 ti naudi a naangay ti panagbobotos para iti presidente iti pagilian.
Kinuna ni Garcia a kinitada nga umuna dagiti Statement of Contributions and Expenditures (SOCE) nga impila dagiti kandidato idi 2022 elections.
No maipapan iti 2025 elections, inlawlawag ni Garcia a saanda pay a kinita ti 2025 'tangay lima a tawen met ti prescriptive period ti election offense.
Ti prescriptive period ket ti panawen a mabalin a maidatag ti legal a tignay wenno darum para iti maysa a pananglabsing iti linteg.
Sinaludsod ni Quimbo ti maipapan iti Section 95 ti Omnibus Election Code, a mangiparit kadagiti kandidato nga umawat iti donasion para iti panagkampania manipud kadagiti contractor iti gobierno.
Kinuna ni Garcia a makium-umandan iti Department of Public Works and Highways (DPWH) tapno makitada no dagitoy a contractor ket adda kontratada iti gobierno sakbay ti panangipilida dagiti kandidato iti certificates of candidacy (COC), isu a kiniddawna a no mabalin, saanna pay nga ipalgak dagiti nagan nga adda listaanda.
Inaklon met ni Garcia a narikut ti ar-aramidenda a panangilasin kadagiti opisial ti kompania a nangidonar iti pondo kadagiti kandidato. (Ellson Quismorio/Manila Bulletin//Lito Hilidon/Bannawag)
